Gran potesta en Santiago de Compostela o 5 de outubro contra a ocupación e xenocidio de Gaza

A 'Coordenadora Galega de Solidariedade coa Palestina' anunciou este martes que convoca para o domingo 5 de outubro a manifestación 'Galicia con Palestina', unha protesta que se realizará baixo a lema "dous anos de xenocidio, 77 anos de ocupación".
 

Os organizadores detallaron, durante rolda de prensa en Santiago, tamén este martes, que a protesta sairá ás 12.00 horas da Alameda compostelá, e que hai máis mobilizacións programadas para o mesmo día noutras 42 localidades galegas.

"Haberá autobuses que, no seu momento, anunciaremos desde a organización para que a poboación poida vir de todos os puntos de Galicia. Tamén xa está previsto que se impriman máis de 5.000 carteis e máis de 20.000 panfletos", afirmou Ánxela Gippini, que forma parte da organización do movemento a través da entidade Galiza por Palestina.
 

Óscar Valadares, que a través da organización 'Mar de Lumes' tamén integra a 'Coordenadora Galega de Solidaridade coa Palestina', engadiu que a convocatoria da manifestación dáse "non soamente polo xenocidio", senón tamén polos "77 anos de ocupación" do territorio por parte de Israel.
 

"Sen ocupación non pode haber xenocidio, e sen o apoio sistemático das organizacións das potencias internacionais e imperialistas non podería haber xenocidio. Israel só non podería manter este nivel de barbarie, de destrución e morte", salientou Valadares.

RELATO PERSOAL

Doutra banda, Sara Ashour, membro da Asociación Galaico-Árabe Jenin e integrante de 'Solidaridade coa Palestina', compartiu un relato persoal sobre o ano de 2019, cando puido acceder á Franxa de Gaza coa súa familia a través de Cisxordania.

"Fomos nun autobús que pasa polas rúas de Israel e, despois, xa entras en Gaza. Eu tiña 17 anos e, desde o autobús, puiden ver eses cambios, a diferenza entre con e sen ocupación. Ver como os israelís teñen infraestruturas, as rúas ben asfaltadas, os semáforos, a orde, centros comerciais... E nós temos os materiais de construción a contagotas", expuxo.
 

Ashour, que ten 22 anos, tamén contou que nun período de seis anos non puido ver aos seus avós debido aos bloqueos de Israel e que, a día de hoxe, non sabe cando volverá ver os seus tíos. "Isto tamén é froito da ocupación", denunciou a moza.