Incendios en Galicia baixo control, oito en Ourense e un de Lugo

Por segundo día consecutivo, todos os incendios declarados en Galicia --actualmente, sete en Ourense e un en Lugo-- permanecen baixo control desde o mediodía do venres. Neste tempo, extinguíronse tres grandes lumes que arrasaron miles de hectáreas en Ourense.

Así o informa a Consellería de Medio Rural na súa última actualización sobre incendios en Galicia, con datos solicitados até as 09.00 horas dos lumes cunha dimensión superior a 20 hectáreas.

Durante a xornada do venres, os lumes quedaron todos baixo control e puidéronse apagar varios dos grandes incendios da onda de agosto. Así, déronse por extinguidos os de Carballeda de Valdeorras (5.300 hectáreas), un dos orixinados en Vilardevós, na parroquia de Vilar de Cervos (2.418,71 hectáreas) e o de Carballeda de Avia (3.296,14 hectáreas).

Pola súa banda, están baixo control os maiores incendios declarados durante a onda, que se converteron nos de maior entidade da historia de Galicia: o de Larouco, con 30.000 hectáreas calcinadas en até 10 localidades tras orixinar na parroquia de Seadur; e o de Chandrexa de Queixa e Vilariño de Conso, con 19.000 hectáreas, onde o foco de Vilariño, polo momento, está estabilizado e os dous de Chandrexa, controlados.

Tamén na provincia de Ourense seguen controlados os incendios de: Avión, parroquia de Nieva (250 hectáreas); Oímbra e Xinzo de Limia, parroquias da Granxa e Gudín (17.000 hectáreas), que calcinou parte doutros sete municipios ourensáns; A Mezquita, parroquia da Esculqueira (10.000 hectáreas), que calcinou terreo noutras oito localidades da provincia e estendeuse até Lugo por Quiroga; Montederramo, parroquia de Paredes (120 hectáreas), e Maceda, parroquias de Santiso e Castro de Escuadro (3.500 hectáreas).

En Lugo, continúa baixo control o lume da Pobra do Brollón, parroquia de Abrence (900 hectáreas), iniciado no mediodía do pasado luns 25.