CSIF esixe frear o recorte de hospitais concertados en Muface

A Central Sindical Independente e de Funcionarios (#CSIF) elevou unha queixa formal a Muface tras constatar un recorte "sen precedentes" nos cadros médicos e hospitais concertados para 2025. Esta decisión coñecíase apenas unha semana despois da firma do novo acordo coas aseguradoras. Para CSIF isto é "un engano" e ve que a medida privará aos mutualistas de especialistas en diversas patoloxías.

Esixencias e advertencias do sindicato

O sindicato esixe a Muface que avalíe o sistema de atención sanitaria, identificando os fallos na dispoñibilidade e os tempos de atención, e que aplique as sancións correspondentes ás compañías aseguradoras segundo o establecido no concerto asinado. Ademais, reclama a creación dun grupo de traballo no Consello Xeral de Muface para controlar a calidade e o servizo prestado, co obxectivo de evitar que se repitan situacións similares no futuro. O sindicato insiste na necesidade de fortalecer o modelo e manter a vixilancia para protexer a atención sanitaria do colectivo mutualista.

Preocupación polos tratamentos en curso

A organización mostra especial preocupación polas persoas con tratamentos activos en centros que só estaban concertados con DKV, entidade que quedou fóra do novo acordo, e esixe unha solución inmediata para estes casos, advertindo que "non se pode xogar coa saúde do funcionariado"

A Central Intersindical Galega (#CIG) denuncia que a inestabilidade e os recortes da aseguradoras mostra a necesidade de deixar atrás o modelo de aseguradoras privadas. Este sindicato reclama que todos os traballadores públicos deben ser atendidos polo SERGAS. Por outra banda, sinala que os recortes realizados mostran a suposta cobiza das aseguradoras médicas. A CIG sinala que Adeslas introduciu ese cambio despois de lograr que Muface aumentase o concerto para os próximos anos, tras ameazar as aseguradoras con deixar sen cobertura aos funcionarios.