North Sail Cuntis vaise a Sri Lanka tras recibir 170.000 € de subvencións da Xunta en 2021

A compañía acábase de adxudicar as velas do buque escola de Armada Española, o Juan Sebastián Elcano. Con todo, non é o único ingreso público que cobrou nos últimos anos.
 

Segundo figura na base de datos do Sistema Nacional de Publicidade de Subvencións e Axudas Públicas, a Consellería de Emprego concedeulle en 2022 unha axuda de 170.707 euros.
 

O destino da liña de axudas que aproveitou North Sails era asegurar a continuidade das compañías mediante “o apoio á solvencia e redución do endebedamento do sector privado” como parte do Plan de Rescate tras a pandemia. De feito, un dos aspectos a cumprir nestas liñas de subvencións era o “o mantemento da actividade económica do solicitante até o 30 de xuño de 2022”.

O alcalde protesta ante a falta de negociación

Menos de tres anos despois, a multinacional propietaria da nave baixa a persiana. Segundo indicou o alcalde de Cuntis en RNE que se trata dunha “deslocalización económica”. 

“Esta xente o único que lle interesa é unha folla de cálculo, si aquí gana un millón pois alá van gañar dous”.
 

Manuel Campos explica que “vai para outro país e concretamente para Sri Lanka porque vos custos de produción alí pois son moito máis baratos que en España”. O político indica que o grupo está controlado en parte por un  fondo de investimento americano e quéixase de que “esta xente o único que lle interesa é unha folla de cálculo, si aquí gana un millón pois alá van gañar dous”.

Galiciapress contactou con North Sails para informar do seu punto de vista, sen recibir por agora resposta. O alcalde tamén se queixou de non ter oportunidade de negociar unha alternativa.
 

En novembro, a compañía gañou o contrato para fornecer as velas ao buque escola no que navega actualmente a infanta Leonor por 400.000 euros, segundo figura na Plataforma de Contratación do Estado, outorgado pola Intendencia de San Fernando, un ente da Armada Española.

Outras fábricas e tendas en España

North Sails SL é parte dun conglomerado internacional, con base en Hamburgo, Alemaña. Foi este grupo quen comprou a factoría de Cuntis fundada a finais dos 70 por Pedro Campos, o regatista que adoita ser o anfitrión do Rei Emérito Juan Carlos I en Sanxenxo.
 

North Sails é unha empresa referente na fabricación de velas para veleiros de competición e recreo, ademais de producir roupa e produtos de alta gama para deportes acuáticos. Fundada en 1957 por Lowell North en San Diego, California, converteuse no maior fabricante de velas do mundo, con operacións en 29 países.

North Sails ten presenza en España máis aló de Galicia, con velerías en Valencia, Barcelona e Mallorca e unha tenda de roupa nun centro comercial en Viladecans e outra en Palma de Mallorca.

A empresa conta cunha rede global de 110 velerías e 150 puntos de venda, empregando a 1.600 persoas en total. Entre as súas plantas de fabricación inclúense instalacións en EE. UU. (Milford, Connecticut; Minden, Nevada), Nova Zelandia (Auckland), Reino Unido (Gosport)  e Sri Lanka (Colombo).

En Sri Lanka, North Sails opera a súa maior planta de fabricación, establecida en 1996 na Zona de Procesamiento de Exportacións de Biyagama, Colombo. Con máis de 900 empregados, a planta manufactura máis de 20.000 velas anuais, aproximadamente a metade da produción do grupo.

O salario mínimo base na illa do Índico é de menos de 100 euros ao mes, é dicir, menos que unha décima parte que o vixente en España.  O salario medio non chega aos 400 euros ao mes.