Denuncian fragmentación fraudulenta nun parque eólico e unha planta solar de Aratel en Cartelle

A Plataforma Stop Eólicos Xurés Celanova denunciou un posible caso de fragmentación fraudulenta na tramitación dun proxecto enerxético en Cartelle (Ourense). Segundo a organización, a empresa promotora, Aratel, solicitaría permisos de maneira separada para un parque eólico de 43,4 MW e unha planta solar fotovoltaica de 9,8 MW, ambos os interconectados e con infraestruturas compartidas. 

Os críticos cos proxectos argumentan que este tipo de operacións, coñecidas como proxectos híbridos, deben ser tramitadas polo Ministerio para a Transición Ecolóxica cando a potencia conxunta supera os 50 MW, algo que a lexislación española establece claramente.

Con todo, o Diario Oficial de Galicia (#DOG) publicou recentemente a solicitude de autorización para a planta solar, que estaría situada a 4 quilómetros do parque eólico, nunha zona de alta densidade de infraestruturas eléctricas.  Isto evidencia que a empresa está a tramitar a planta solar e a eólica ante a Xunta.

Stop Eólicos advirte que este procedemento incumpre a normativa, xa que a tramitación conxunta debería incluír un estudo de impacto ambiental tamén conxunto, algo que non se presentou.

Ademais, a plataforma sinala que o proxecto expón un importante impacto no medioambiente e na comunidade local. 

Polo momento, Aratel non emitiu declaracións públicas sobre estas acusacións de fragmentación fraudulenta.   

A planta solar ocuparía unhas 16 hectáreas e requiriría unha liña de evacuación soterrada de 5,7 quilómetros até a subestación asociada ao parque eólico no Coto Novelle.

Un proxecto polémico nun rural dividido ante os eólicos

O proxecto eólico Arnoia, actualmente en fase de exposición pública até o 16 de xaneiro, xa acumula máis de 700 alegacións presentadas por veciños e colectivos. Segundo a plataforma, este desenvolvemento de aeroxeradores de 220 metros de altura afectaría a terreos que separan os ríos Miño e Arnoia, nos municipios de Castrelo e Cartelle. A iso súmase agora a nova planta fotovoltaica, que amplía a envergadura do proxecto.

Parte dos veciños levan meses movilizandose. A campaña contra o parque eólico inclúe mesas informativas, como a organizada hoxe en Ribadavia, coincidindo coa feira local. Stop Eólicos anunciou que tras pechar o prazo de alegacións do parque eólico, iniciará unha nova ofensiva contra a planta solar, cuxo período de exposición pública finaliza o 20 de febreiro.

Fragmentación e a lexislación

En España, os proxectos de xeración eléctrica de máis de 50 MW de potencia deben ser tramitados a nivel estatal, aínda que a Xunta tamén debe remitir informes. A fragmentación fraudulenta ocorre cando unha empresa divide artificialmente un proxecto para non chegar aos 50MW e acoller a procedementos autonómicos, considerados máis áxiles ou laxos nalgúns casos. 

O Tribunal Superior de Xustiza de Galicia (#TSXG) fallou en varias ocasións que esta práctica vulnera a normativa ao fraccionar artificialmente proxectos que deberían analizar de forma integrada.