Adoptar animais de compañía: non todo o mundo está preparado

A maioría das persoas que viven en cidades e queren unha mascota buscan un animal adaptado á superficie da vivenda. Os máis reclamados son cans de pequeno tamaño ou gatos. Pódense comprar mascotas en tendas de animais pero tamén se adoita recorrer aos refuxios de animais, onde van parar sobre todo cans e gatos abandonados ou atopados na rúa. Hoxe en día as leis de protección e sanidade animal son exixentes sempre que se trata de seres vivos e búscase a súa protección ante posibles agresións, malos tratos e abandonos. Non todos estamos preparados para ter un animal de compañía e coidalo nin calquera fogar está en condicións para acoller un destes animais. 

RESPONSABILIDADE

“Non todo o quere adoptar unha mascota é consciente de que a adopción leva responsabilidades” di Alberto Losada da Sociedade Protectora de Animais e Plantas de Lugou. Son moitos e moitas que buscan regalar un can, un gato ou outro animal coma se fose un obxecto ou para satisfacer un capricho. “Hai subvencións para a adopción de mastines destinados á protección do gando e na protectora recibimos chamadas preguntando por mastines co único interese en obter a subvención”, declara Losada.

Tanto o mastín español como o can de palleiro galego son animais solicitados para a garda de gando. Con todo, o temor de moitas protectoras e persoas involucradas na protección animal é que se dispare a petición destes exemplares e en breve, obsérvese un gran abandono dos mesmos unha vez pasada a “febre” da subvención. En tal caso, débese lembrar que un can de garda para o gando non pode estar nunha casa, debe criar xunto ao propio gando.

“Moita xente que adopta non se dá conta ou non é consciente de que o animal crece, que non é un floreiro, aínda que cada vez existe maior concienciación” sinala Losada. “A maioría das persoas que veñen adoptar un animal si son conscientes de que se trata dun ser vivo” apunta Olalla García, do Refuxio de Bando, en Santiago. “Outras persoas só buscan un animal de compañía sen ser conscientes de que a responsabilidade con ese animal é para toda a vida”.

ADOPCIÓN

A persoa que desexe adoptar un can debe ser maior de idade. Os refuxios e protectoras farán un cuestionario ás persoas interesadas en adoptar para saber si esa persoa está capacitada e mesmo pode haber unha entrevista persoal. Entre outras cuestións, quererán saber a que tipo de vivenda irá parar o animal e, si as cousas salguen ben, asínase un contrato de adopción. Tamén é frecuente que desde as protectoras e refuxios fagan un seguimento do animal e a súa evolución dentro do seu novo fogar. Tamén é necesario realizar un curso para poder ter un can segundo a Lei de Protección Animal de Galicia. 

“Existen moitos adoptantes sen experiencia con animais pero que veñen con toda a súa boa vontade, aínda que con isto non basta” sinala Losada. “A xente que ten casas no campo ou con leiras adoitan buscar cans medianos ou grandes e despois cans pequenos, sobre todo femias, para zona urbana”. Con todo, “un can necesita que o saques do piso polo menos tres veces ao día porque o necesita, senón, é mellor un gato”.

“Preguntamos cantas persoas conforman o núcleo familiar e si todos están de acordo na adopción, o tipo de vivenda e si o animal terá un espazo para el” di Olalla García. “Por outra banda, deben ser conscientes de que un animal leva unhas responsabilidades como son a alimentación, o seguimento veterinario, si son conscientes dos anos que pode vivir e que todo isto son gastos”.

Aínda así, hai quen se considera suficientemente preparado para ter un animal de compañía soamente por ter cans ou gatos na súa casa toda a vida. Quizá de actitudes como esta os propios animais poden sufrir e volver máis agresivos. “Son as persoas as que transforman en violento a un can”. E é que o ter cans ou gatos per sei non adoita ser suficiente para coidar un animal que vai ser a túa compañía mentres viva.

Finalmente, as recomendacións son animais pequenos para pisos urbanos (razas de cans pequenos e gatos) e para leiras ou casas de campo os máis grandes. De todos os xeitos, antes de realizar unha adopción hai que estar seguro de si deséxase ter a este animal e coñecer ben a Lei de Benestar Animal no referente a animais de compañía.