(VÍDEO) A firma galega elPulpo viste a Lamine Yamal, Joselu ou Unai Simón durante esta Eurocopa
A compañía galega selou un acordo coa Real Federación Española de Fútbol e lanzou unha liña acorde á cita continental.
Con medio país pegado á pantalla durante 90 minutos, os partidos da Selección Española de fútbol durante esta Eurocopa paralizan a nación cada vez que hai partido. Sucedeu o sábado, coa gran vitoria da Vermella ante Croacia por 3-0 e sucederá o xoves, a partir das 21 horas, cando se midan a Italia , vixente campioa de Europa. Os afeccionados seguen con atención cada encontro e xa sexa desde a bancada ou desde as súas casas agora pódeno facer á última, grazas á alianza da Real Federación Española de Fútbol coa compañía coruñesa elPulpo, un dos últimos berros da moda en todo o territorio.
UNHA COLECCIÓN PARA O EURO 2024
O ascenso da firma galega foi fulgurante, en parte grazas a este vínculo que une á empresa coa RFEF até, polo menos, o próximo Mundial de Fútbol, que se celebrará en Estados Unidos, México e Canadá. Con motivo do Euro de Alemaña, elPulpo lanzou unha segunda colección cápsula que xa causa furor.
Con 'O Desquite' como título da campaña, a colección chega cun anuncio no que o seleccionador Luís de la Fuente convoca a uns rapaces para retar a algunhas das estrelas da selección, como Ferran Torres, Lamine Yamal ou Le Normand.
Camisetas, camisas, sudaderas, gorras, pulseiras e até gravatas compoñen esta nova colección con tons propios dos equipamentos do equipo nacional, cunha especial homenaxe a Naranjito e o Mundial de España 82.
UN POLBO FÍXONOS CAMPIÓNS DO MUNDO
Desde a RFEF Pedro Rocha festexou que sexa esta firma a que vista á Selecicón xa que en Sudáfrica foi "un polbo" o dixo que serían "campións do mundo". "Un polbo está agora aquí connosco, e oxalá consigamos tantos éxitos como entón", destacou.
Jose Antonio Chacón, CEO Founder de elPulpo, mostrou a súa alegría por este acordo. "Esta asociación permítenos fusionar a nosa paixón pola moda co orgullo de representar a España no mundo do deporte. Para nós é un privilexio deseñar estas coleccións exclusivas que reflicten o espírito da RFEF e representa a marca España. Sen dúbida, é un soño cumprido para todos os que formamos parte de elPulpo", afirmou.
"elPulpo volve apostar polo algodón orgánico 100% para reafirmar o compromiso de ambas as partes co coidado do medioambiente e a sustentabilidade. Do mesmo xeito que a primeira, esta segunda colección será a que os integrantes da Federación Española de Fútbol e os compoñentes da Selección Española de Fútbol lucirán en todas as súas competicións", engaden desde a empresa, que espera acompañar ao combinado nacional até o seu cuarto título europeo.
Escribe o teu comentario