O Papa nomea ao sacerdote ribadense Antonio Valín novo bispo de Tui-Vigo

O papa Francisco nomeou bispo de Tui-Vigo ao sacerdote Antonio José Valín Valdés, que na actualidade é vicario xeneral da diocese de Mondoñedo-Ferrol, segundo informou a Conferencia Episcopal Española (#CEE).

O bispo electo de Tui-Vigo naceu en Ribadeo o 24 de febreiro de 1968. En outubro de 1986 ingresou no Teologado diocesano en Santiago de Compostela, realizando os seus estudos no Instituto Teolóxico Compostelán de 1986 a 1992 e foi ordenado sacerdote na catedral de Mondoñedo o 14 de marzo de 1993.

O seu ministerio sacerdotal desenvolveuno na diocese de Mondoñedo-Ferrol onde desempeñou distintos cargos: formador e profesor do seminario de Mondoñedo (1992-1999); párroco de San Sadurniño e outras (1999); subdelegado de Pastoral Xuvenil, Vigairía Ferrol (1999); director da residencia universitaria da Domus Ecclesiae de Ferrol (2000); delegado diocesano de Pastoral Vocacional (2002); director espiritual do seminario maior (2006); arcipreste de Terra Chá (2006/2009); delegado episcopal de Pastoral de Infancia e Mocidade (2007); director espiritual do seminario maior e menor (2011); párroco de Santiago de Foz e outras parroquias da zona (2012); arcipreste de Mondoñedo (2012/2016/2019); secretario de Pastoral (2015/2016); delegado Ano Xubilar da Misericordia (2015); formador seminaristas menores diocesanos (2019); e vigairo episcopal para a Evangelización (2017). Tamén foi profesor do ISCRD 'San Agustín' e da EDT.

Foi administrador diocesano de Mondoñedo-Ferrol desde o 21 de decembro de 2020 até o 4 de setembro de 2021, cando tomou posesión Monseñor Fernando García Cadiñanos como bispo desta diocese.

Foi membro da delegación de Pastoral Vocacional e do COV de Viveiro; do equipo sacerdotal de Vilalba; do equipo sacerdotal de Vilalba-Abadín-Xermade; do Consello Presbiteral; do Colexio de Consultores; do Consello Diocesano de Goberno; e do Consello de Pastoral.

Na actualidade é párroco in solidum e moderador da UPA de Foz (desde 2019); reitor do seminario menor de Mondoñedo (desde 2001); e vigairo xeral e moderador da Curia (desde 2021). É cóengo da catedral de Mondoñedo (desde 2018) e tamén é o consiliario do "Colectivo Campamento Diocesano" (desde 2003).

O nomeamento fíxose público ás 12.00 horas de hoxe, sábado 25 de maio, e así o comunicou a Nunciatura Apostólica á Conferencia Episcopal Española. Desde 2010 era bispo de Tui-Vigo Monseñor Luís Quinteiro Fiuza.