San Xoán traerá unha onda de calor cuns 30 graos na area e 21 na auga en praias como Riazor ou Samil

A previsión nas praias da Coruña cidade (Riazor e Orzán) para a noite de San Juan apunta a unha temperatura máxima de 25 graos o venres e 32 o sábado. Ceos completamente despexados e ventos moderados polas mañás e bambos o resto do día. 

A previsión para praias da Ría de Vigo e do resto das Rías Baixas como Samil é duns 27 graos de temperatura máxima tanto venres como sábado. Ceos sen unha nube con ventos e ondadas bambas. Sensación térmica de calor agradable.

A temperatura da auga na maioría das praias de Galicia oscilará entre os 19 graos o venres e o 21 o sábado, o que é unha temperatura agradable para dar un baño

A sensación térmica ao comezo da noite de San Xoán en Galicia non baixará dos 20 graos no sur do país, chegando a roldar os 25 nas Rías Baixas e os vales de Ourense.  No norte e na costa da Coruña será algo máis fresca, ao redor dos 20 graos, 17 en Viveiro.

A primeira onda de calor do ano provocada pola entrada dunha masa de aire moi cálido procedente do norte de África disparará os termómetros por encima dos 30ºC en Galicia desde este xoves até, previsiblemente, principios da próxima semana.

As previsións apuntan a que en Galicia e litoral cantábrico as máximas alcanzarán valores superiores aos normais até a xornada do sábado, cando poderían superar os 34 a 36ºC en zonas do val do Miño. A partir do domingo empezarán a descender as temperaturas no extremo noroeste peninsular.

A previsión de Meteogalicia para o venres é que continuaremos baixo a influencia de altas presións con centro no norte da Península. Espérase un día de tempo seco con ceo parcialmente nubrado a despexado con posibles refachos costeiros do norte. As temperaturas mínimas non terán cambios significativos mentres que as máximas subirán moderadamente. O vento soprará do nordés, bambo en terra e con intervalos moderados no litoral coruñés. Nas cidades, só Ourense superará os 30 graos.

A previsión de Meteogalicia para o sábado sábado é que continuarán as altas presións cara ao norte da Península e debilitarase a chegada de aire cálido procedente do norte de África. Será un día con ceo parcialmente nubrado ou despexado. As temperaturas ascenderán entre leve e moderadamente, con valores máximos elevados. O vento soprará de dirección variable, con intervalos fortes de levante no mar ao redor de Estaca de Bares. O sábado está previsto que todas as cidades de Galicia salvo A Coruña superen os 30 graos.

Así, a calor e a crecente estabilidade chegará este xoves despois de varias semanas de inestabilidade xeneralizada e provocará chuvascos, tormentas e temperaturas máis frescas do normal e consolidarase os seguintes días.
 

A zona de maior calor será o cuadrante suroeste e o centro peninsular, onde as temperaturas máximas superen os 38ºC e excederanse os 40 ou 42ºC en zonas do val do Guadalquivir e o Guadiana.

As mínimas tamén serán moi altas no cuadrante suroeste peninsular e a AEMET prevé noites tropicais que non baixarán de 20 a 22ºC en amplas zonas. É probable que os primeiros días da próximas semana tanto as máximas como as mínimas se manteñan nestes valores. No resto da Península e Baleares tamén terán temperaturas altas pero máis moderadas.

Así, até o domingo seguirán subindo as temperaturas e pasarán de 36ºC en zonas da meseta norte e interior de Mallorca. En puntos do val do Ebro chegarán a 38ºC.

En concreto, as temperaturas máis altas espéranse no cuadrante suroeste peninsular e estenderanse nesta zona o período álxido do episodio até mediados da semana que vén. A partir de entón, podería chegar un descenso xeneralizado das temperaturas, que volverían alcanzar valores propios de finais de xuño.

En Canarias non se producirá un ascenso térmico tan marcado durante os próximos días, pero é probable que si teña lugar desde comezos da semana próxima.