BNG, PSdeG, Podemos e Vox alegarán contra o plan de cobertura da CRTVG

O BNG, o PSdeG, Podemos e Vox confirmaron que prevén presentar alegacións contra o plan de cobertura da CRTVG das eleccións municipais do 28 de maior do que discrepan por diferentes motivos, desde a formulación dos debates nalgúns casos á presenza das forzas políticas. No PPdeG, pola súa banda, expresaron conformidade co mesmo.

O BNG informou nun comunicado que recorre ante a Xunta Electoral da Coruña o plan ao entender que "os medios públicos minimizan a difusión dunha información fundamental para a cidadanía, relegando a horarios de moi escasa audiencia entrevistas e debates".

Segundo sinala a formación nacionalista, "incúmprese o deber como medio público de garantir o pluralismo político e social" e ven "desproporcionado" o tempo designado ás forzas políticas, salvo o PP e PSOE, sen ter en conta os resultados das eleccións equivalentes anteriores en Galicia ". A consideración que fai o Bloque refírese a Vox que, "con cero concelleiros disporá da metade de tempo asignado ao BNG", a pesar de que carece "de implantación algunha no territorio".

Aseguran, así mesmo, que o plan está "incompleto" por non especificar a programación especial da xornada electoral. Os nacionalistas piden a realización de entrevistas aos principais candidatos de formacións con ámbito de implantación en Galicia en horarios e formatos de maior audiencia, como o prime time da TVG. Solicitan tamén unha repartición proporcionada do tempo en función dos resultados das anteriores eleccións equivalentes, así como que se reconsidere a condición de grupo político significativo e que se introduza na temática os debates e cuestións relativos á lingua, cultura e patrimonio, así como igualdade e medio ambiente.
 

CRÍTICAS DOS SOCIALISTAS

Fontes socialistas explicaron, pola súa banda, que acudían á cita con "malestar" polo feito de que a CRTVG fixase as datas dos debates sen consultar "a ninguén".

Tras a reunión, estas mesmas fontes confirmaron que presentarán alegacións contra o plan ao discrepar coas datas elixidas para os debates, ao considerar que non foron dialogadas. Sinalaron, así mesmo, que tamén hai discrepancias compartidas entre distintas forzas sobre os enunciados dos bloques temáticos destes debates.
 

ALEGACIÓNS DE PODEMOS E VOX

Pola súa banda, fontes de Podemos avanzaron que prevén presentar tamén alegacións ao plan, indicando que deben estudar o asunto en profundidade.

Cidadáns, pola súa banda, non prevé, a priori, dar batalla, mentres que fontes de Vox confirmaron que tamén recorrerán o plan, por ser incluídos nos bloques informativos, pero non así en debates e entrevistas para as cidades.

As fontes consultadas alegan que, tendo en conta que son recorridos como "grupo político significativo", e o foron xa legalmente en 2019, "non ten sentido" que se aplique ese criterio para os bloques de noticias, pero non para outros xéneros que ven "igualmente informativos".
 

PLAN DE COBERTURA DAS ELECCIÓNS

O plan de cobertura da CRTVG para as próximas eleccións municipais do 28 de maio inclúe nos seus bloques informativos de actualidade electoral a Vox , a pesar de que a formación non logrou representación ningunha na corporación galega nos últimos comicios locais do 2019. O motivio é que se lle recoñece como "grupo político significativo".

Vox fora excluído catro anos atrás do plan de cobertura dos medios públicos galegos e, entón, presentou un recurso e a xunta electoral deulle a razón recoñecéndoo como grupo político significativo, basear fundamentalmente nos resultados que obtivera nas anteriores eleccións xerais.

Neste caso, o propio documento de cobertura que propón a CRTVG identifica como grupos políticos significativos a partidos, federacións ou coalicións que presenten candidatura en municipios que comprendan, "polo menos ao 50% da poboación de dereito nas circunscricións incluídas no ámbito de difusión dos medios".

Arguméntase así mesmo que se recoñece tamén esta condición a formacións políticas que concorran ás locais e cumpran o requisito anterior, e que, a pesar de non haber presentado ás anteriores eleccións equivalentes ou non ter representación nelas, con posterioridade, en recentes procesos electorais e no ámbito de difusión do medio, obtivesen un número de votos igual ou superior ao 5% dos votos válidos emitidos.

As posteriores eleccións aos locais de 2019, agrégase o plan de cobertura, son os xenerais dese mesmo ano e as autonómicas de 2020. Aínda que tamén quedou fóra do hemiciclo galego, Vox si que ten representación no Congreso dos Deputados. Nesta conxuntura, disporá de 20 segundos nos principais bloques electorais tanto da Televisión de Galicia como da Radio Galega.
 

REPARTICIÓN DE TEMPOS

A repartición de tempo nos bloques de información electoral da CRTVG que se pon sobre a mesa son de 1 minuto e 43 segundos para o PP, 1 minuto e 42 segundos para o PSOE, 40 segundos para o BNG, 20 segundos para Vox e 15 segundos para outras formacións políticas.

Na Radio Galega, os tempos asignados para as distintas formacións nos 15 días de campaña serán de 2 minutos e 5 segundos para o PP, 2 minutos e 3 segundos para o PSOE, 48 segundos para o BNG, 20 segundos para Vox e 15 segundos para outras candidaturas.
 

VOX EXCLUÍDO DOS DEBATES MUNICIPAIS

Ademais de informar sobre a súa actividade no bloque reservado a "outros", formacións que, a diferenza de Vox, si que teñen concelleiras nas principais corporacións terán presenza noutros espazos. Por exemplo, nos debates de candidatos nas ciudadaes que propón a CRTVG entre os días 15 e 24 de maio, ou nas entrevistas radiofónicas.

No caso dos debates das cidades, o plan de cobertura constata que a participación nos mesmo restrinxirase exclusivamente ás cabezas de lista de cada formación política con representación na Corporación municipal, o que sitúa fóra dos mesmos aos candidatos da formación de Santiago Abascal.

Os debates televisados dos candidatos de Vigo proponse para o 15 de maio; para o 16, o da Coruña; 18, Ourense; Lugo, o 19 de maio; Santiago, o 22; Pontevedra, o 23, e Ferrol, o 24 de maio.
 

A CRTVG ASEGURA QUE SE AXUSTA Á LEI

Fontes da CRTVG destacaron que o Plan de Cobertura está suxeito á Lei Orgánica de Réxime Electoral Xeneral, como marco legal "base de todo o documento" e que os tempos respectan o principio de proporcionalidade. "A CRTVG o que fai é aplicar os criterios que marca a lei", indicaron.