A Mariña triplica a súa poboación, pero non os seus sanitarios: ata 15 días de espera para unha cita médica
A Plataforma Sanitaria da Mariña denunciou este luns esperas para consultas en centros de saúde da comarca de "ata quince días", unhas demoras que consideran "inasumibles".
Desde a Plataforma Sanitaria da Mariña denuncian a situación crítica na que se atopa a sanidade da comarca luguesa.
A Atención Primaria está "sobrepasadísima" nun contexto no que o turismo multiplicou substancialmente a poboación da zona.
A Plataforma Sanitaria da Mariña denunciou este luns esperas para consultas en centros de saúde da comarca de "ata quince días", unhas demoras que consideran "inasumibles".
A presidenta da plataforma, Montse Porteiro, constatou que, na zona, a "Atención Primaria está sobrepasadísima, porque ademais de que non se cobren vacacións, nin días de libre disposición, nin baixas, van xa dous anos que non poñen nin médicos, nin enfermeiras para as persoas desprazadas ou para os turistas".
Así, alertou de que nestes momentos na Mariña "triplícase a poboación". "Nestas poboacións litorais multiplícase a poboación por tres e, a maiores da sobrecarga que xa soportan por estar un mínimo de persoal, teñen que atender tamén a todos os desprazados. Hai veces de demoras de ata quince días para unha cita na Mariña", lamentou.
Porteiro puxo o exemplo de Barreiro en alusión ao "desmantelamento" que se observa na Atención Primaria na Mariña de Lugo. "En Barreiros hai tres médicos, un que leva de baixa moito tempo e non está a ser cuberta. Vai haber algún día que non estará nin a que está de baixa, nin a substituta, nin algún dos outros dous médicos. Ante isto o que fan é programar consultas para a tarde con médicos doutros lugares e que xa estiveron a traballar pola mañá", avisou.
200.000 HABITANTES
Finalmente, calculou que eses meses estivais pódense pasar "os 200.000 habitantes, nos 14 concellos da Mariña. "Algúns son pobos de 3.000 habitantes e agora igual atopámonos con 12.000 ou 15.000 persoas", exemplificou.
A Plataforma Sanitaria da Mariña súmase á UXT na advertencia de como se pode estar "a devaluar" o servizo sanitario ante a presenza de desprazados e turistas en toda esta comarca da provincia de Lugo.
Escribe o teu comentario