Estrella López-Pardo, nova xerente do SERGAS no lugar de José Flores, que asume a área de Pontevedra

A ata o de agora directora xeral de Planificación e Reforma Sanitaria substitúe a José Flores, que se pon á fronte da área sanitaria Pontevedra-O Salnés.

Estes cambios veñen provocados polos momentos de tensión asistencial e colapso rexistrados nas últimas semanas na área pontevedresa, pero tamén noutros puntos de Galicia. 
 

A directora xeral de Planificación e Reforma Sanitaria, Estrella López-Pardo Pardo, será a nova xerente do Sergas en substitución de José Flores, quen se poñerá á fronte da área sanitaria Pontevedra-O Salnés.

Flores era xerente do Sergas desde setembro de 2020, cando relevou no cargo a Antonio Fernández-Campa. Agora, márchase á área de Pontevedra, onde substituirá a José Ramón Gómez, no marco dunha crise na que os sindicatos ameazaran cunha folga ante a "deterioración" da atención.

En roda posterior ao Consello de la Xunta, Alfonso Rueda, explicou que a marcha de José Ramón Gómez produciuse "a petición propia", a quen agradece "máis de cinco anos de intensísimo servizo".

Sobre José Flores, que nomeará un "novo equipo directivo" na área de Pontevedra, Rueda dixo que lle agradece o seu traballo no Sergas, despois duns anos "nada sinxelos".

No tocante a Estrella López-Pardo, Rueda destacou a súa "ampla experiencia" en diferentes cargos do Sergas, un organismo que coñece "á perfección".

CURRÍCULO

Estrella López-Pardo, nacida en 1959 en Lugo, é licenciada en Medicina e Cirurxía pola Universidade Complutense de Madrid (1983), especialista en Medicina Preventiva e Saúde Pública.

Así mesmo, é Máster en Epidemioloxía e Metodoloxía da Investigación da Universidade París XI, Máster en Administración e Xestión Sanitaria e Máster en Avaliación de Tecnoloxías Sanitarias da USC e diplomada en Estatística e Epidemioloxía pola Universidade París VI. Tamén é vicepresidenta da Sociedade Española de Directivos de Atención Primaria (SEDAP).

Desempeñou os cargos de subdirectora xeral de Planificación Sanitaria do Sergas, subdirectora xeral de Avaliación Asistencial, directora operativa do Complexo Hospitalario Universitario de Santiago de Compostela, subdirectora de Calidade e Atención ao Paciente na área de Santiago e directora de Procesos de Soporte da área sanitaria Pontevedra-O Salnés.

Foi coordinadora de proxectos da Comisión Técnica Interreg, así como catro proxectos de Innovación Hospital 2050, entre outros.