STEG e pais do CEIP Plurilingüe de Vilaxoán denuncian a "situación límite" dos seus alumnos máis vulnerables

O #CEIP Plurilingüe de Vilaxoán é un de tantos centros escolares galegos que, desde o inicio do curso, sofren a falta de profesionais no persoal docente para poder garantir unha correcta educación pública aos estudantes. O Sindicato de Traballadoras e Traballadores do Ensino (STEG) vén de reunirse co equipo directivo do centro arousán e destaca a "situación límite" na que se atopa o centro público, que conta con máis de 200 alumnos pero no que practicamente un terzo deles "pertence ao Departamento de Orientación". 

MÁIS NECESIDADES, MENOS RECURSOS

Isto quere dicir que case un de cada tres alumnos do centro presenta trastornos conductuales, TEA ou son grandes dependentes, o que fala da situación de especial vulnerabilidade dos estudantes. "A cifra aumentará ao longo do curso", apuntan fontes de STEG a este diario, xa que unha parte do alumnado está pendente de avaliación pola "falta de persoal" no Departamento de Orientación, polo que os informes psicopedagógicos quedaron relegados a "un segundo plano". 

Neste sentido, e a diferenza do pasado curso, este ano o de Vilaxoán incorporou catro alumnos máis con necesidades especiais. Con todo, os recursos no centro minguaron con respecto ao ano pasado nun centro "excluído do programa PROA+", aínda que desde STEG sinalan que o CEIP Plurilingüe si cumpre con todos os requisitos para poder formar parte deste programa. 

"A atención nestas condicións resulta moi deficitaria, xa que este alumnado necesita un tratamento educativo especial. A medida que aumentan as necesidades, os recursos non aumentan, senón que hai que repartilos entre máis alumnos", critica o sindicato, advertindo que neste escenario os colexiais verán "limitadas a súa posibilidade de desenvolver plenamente as súas capacidades ante a falta de recursos". 

PROTESTA O 5 DE DECEMBRO

Nesta liña, desde STEG denuncian que os docentes do centro están hoxe "desbordados" pola alta carga de traballo á que se enfrontan, o que provoca a "frustración" do claustro. A falta de persoal é evidente: con só dúas coidadoras, o centro supera, por moito, o cociente establecido nun coidador por cada seis alumnos. En Vilaxoán, os coidadores repártense a nove alumnos, quedando algúns estudantes "sen ser atendidos nalgúns momentos", con mención ás materias de Eduación Física, Música ou Inglés.

"A Consellería de Educación non dotou ao centro do persoal necesario para atender as necesidades especiais que se presentan neste curso, polo que carecemos do persoal mínimo para cubrir as necesidades e pola que o profesorado sofre unha sobrecarga de traballo que imposibilita unha educación equitativa e de calidade", reprende o sindicato, á vez que agrega que "a diversidade non é un capricho, senón unha realidade e require unha resposta inmediata". 

"Escolarizar a un neno con necesidades educativas especial nun centro ordinario sen apoios e sen recurso non é inclusión, é exlcusión", abundan sobre un centro no que o equipo directivo presentou a súa dimisión a pasada semana ao perder a confianza dos pais. Aínda que as denuncias son reiteradas no tempo, até agora non foron atendidas pola Consellería, á que reclaman un mestre especializado en Pedagoxía Terapéutica (#PT) e de, polo menos, un coidador a maiores para que o alumnado non permaneza "indefenso" e poida estar "integrado" no desenvolvemento delas clases.

Este asunto, que mesmo ocupou un lugar destacado recentemente no pleno do Concello de Vilagarcía, foi presentado ante Inspección e distintos organismos, polo que o sindicato e os pais dos alumnos anunciaron a convocatoria dunha mobilización o próximo 5 de decembro ás 14:30 horas ante o centro de Vilaxoán.