Cambados homenaxea ás vítimas do Pitanxo e a todos os náufragos do mar

Cambados rendeu este sábado homenaxe aos falecidos no afundimento da Vila de Pitanxo en febreiro de 2022, en augas de Terranova e a todos os náufragos do mar coa colocación de dúas placas conmemorativas no paseo marítimos do pobo do Salnés.

Cambados sumouse así aos actos en memoria aos falecidos da 'Vila de Pitanxo', que se foron desenvolvendo nos últimos dez días con motivo do primeiro aniversario da traxedia que acabou coa vida de 21 persoas.

Un deles era Miguel Ángel Lumbres, que residía en Cambados desde facía 14 anos. Chegou ao pobo pontevedrés de Perú e foi o último en enrolar na Vila de Pitanxo.

Fíxoo a última hora, ao ser chamado polo armador para que substituíse a un dos tripulante que dera positivo en Covid-19 nas probas ás que foron sometidos todos os mariñeiros antes de partir do porto de Marín cara a Terranova.

Emilio Lumbres, o seu fillo, participou tamén no acot de inauguración da placa en honra ás vítimas da traxedia, que se colocou xunto con outra dedicada aos mariñeiros de Cambados mortos en naufraxios.

Xunto a el estiveron outros familiares dos náufragos do Pitanxo, acompañados por familias do Bahía, o pesqueiro con base en Cambados no que morreron dez persoas en 2004 ao afundir nas illas Sisargas, e do Sen Querer Dous, un barco de Portonovo pero con tripulación de Cambados no que faleceron catro persoas ao naufragar fronte a Fisterra en 2018.

"Todo o que reclamamos as familias das vítimas do Pitanxo é un legado que queremos deixar para todas as familias do mar", declarou María José De Pazo este sábado, onde reivindicou a irmandade e a solidariedade que existe entre a xente do mar.