Besteiro responde sobre Pedro Blanco ou Patricia Igrexas para a alcaldía de Santiago, sen mencionar a Bouza

Nas oficinas do PSdeG amontóanse os deberes pendentes. A sucesión de asuntos que ten que atender José Ramón Gómez Besteiro deixa moitos capítulos sen pechar polo socialista, que terá que dar carpetazo nos próximos meses a unha serie de cuestións sobre as que foi preguntado este fin de semana. Na entrevista concedida á Cadea Ser este domingo 18 de xaneiro, o secretario xeral dos socialistas galegos contestou en clave municipal, cando restan algo menos de ano e medio para as próximas eleccións locais, previstas para a primavera de 2027.

PEDRO BLANCO, PATRICIA IGREXAS, AITOR BOUZA, SINDO GUINARTE...

De face a ese proceso electoral, aínda quedan por despexar bastantes incógnitas, como a que rodea á candidatura do atomizado PSOE de Santiago, onde as diferenzas no grupo socialista dinamitaron o partido e terminaron con catro edís expedientados, que agora integran o grupo de non adscritos e enfróntanse de maneira directa co secretario xeral dos socialistas composteláns, Aitor Bouza, que en setembro pasou a formar parte da Cámara autonómica.

Sobre cando se vai a coñecer o candidato ou candidata á alcaldía, Besteiro dixo que será este ano cando se abra o proceso de elección, pero que no que se enfoca o partido nestes momentos é por "ofrecer un bo proxecto nunha cidade que está decadente". Nesa liña, criticou a "perda de forza" da capital baixo a alcaldía da nacionalista Goretti Sanmartín. 

"A forza, a potencia, a visualización de Santiago en Compostela sempre foi en mandatos do Partido Socialista", reivindicou Besteiro, que tamén se pronunciou sobre dous nomes propios desa carreira por ser o alcaldable do PSOE de Santiago: o delegado do Goberno en Galicia, Pedro Blanco, e a parlamentaria autonómica Patricia Igrexas.

Son dous nomes que figuran en todas as quinielas e sobre os que se mollou Besteiro ao sinalar que Branco "sería un bo candidato" e que Igrexas será "unha boa candidata". "Pero hai máis", engadiu o secretario xeral, sen citar de maneira expersa ao propio Aitor Bouza ou a Sindo Guinarte, hoxe portavoz socialista no Pazo de Raxoi. 

"Creo que pode haber máis persoas que poidan desempeñar ese papel, pero esas dúas persoas paréceme que son unhas persoas capaces, brillantes, con proxecto e con moitísima proxección", debullou Besteiro á vez que salientou que "este ano tamén o propio partido decidirá a un bo candidato ou candidata para as vindeiras". 

UNHA CUESTIÓN DE XÉNERO?

En plena tormenta polo 'Caso Tomei', tampouco se escapou a oportunidade de saber si sería preferible, tras o ocorrido, que na capital houbese unha candidata sobre un candidato, algo sobre o que non se pronunciou Besteiro, deixando esa responsabilidade en "os militantes e os membros, as persoas, os homes e mulleres de Compostela, e decidirán en base a unha serie de parámetros". 

Sobre o que si foi claro foi na postura crítica contra o PP polas mocións de censura que se deron nos últimos meses en localidades como Viveiro ou Ribeira, ante o temor de que esta circunstancia poida dar noutros municipios, como Lugo ou a mesma Santiago. "Non se pon colorados", recoñece Besteiro sobre a "fomra de facer política" dos populares con estes "pactos da vergoña", como os denominou. 

"Hai un incumprimento total deses supostos acordos para mellorar un municipio e é a porta que sempre utiliza o Partido Popular. A vergoña amparada nunhas mocións de censura. Por tanto, primeiro, rexéitoa totalmente e, en segundo lugar, creo que é marca da casa do Partido Popular, non de agora, de toda a vida política", abundou, resolvendo que son "os propios veciños e veciñas" os que deben realizar ese cambio cos seus votos.