Polémica en torno ao subdirector de Inspección Educativa, que tachou ao profesorado de "clase ociosa"

O BNG esixe o "cesamento inmediato" do subinspector de Inspeccción e Avaliación do Sistema Educativo da Xunta, Enrique Prado Cova, polas súas "accións e pensamentos fascistas" nunha serie de artigos publicados por el mesmo en Internet.
 

Ademais, solicitará a comparecencia no Parlamento do conselleiro de Educación, Ciencia, Universidades e FP, Román Rodríguez, e da directora xeral de Ordenacción e Innovación Educativa, Judith Fernández, tanto por este asunto como polas polémicas instrucións para o próximo curso, que inclúen a "neutralidade ideolóxica" das actividades dos centros.

Nun comunicado, a portavoz do Bloque en materia educativa na Cámara galega, Cristina Fernández, cualificou de "intolerable" que alguén coas súas responsabilidades "actúe en contra dun sistema educativo baseado nos valores democráticos e no pluralismo".
 

Por exemplo, nalgúns destes artigos, Prado Cova refírese aos profesores como "clase social ociosa", critica á oposición e cuestiona a atribución das competencias en educación ás comunidades autónomas e a esixencia de coñecemento do galego para acceder ao emprego público.

Foi a CIG, principal sindicato do ensino público da Comunidade, a que desvelou a existencia destes escritos no medio da polémica polas instrucións para o próximo curso, nas que a Xunta introduce un parágrafo para garantir a "neutralidade ideolóxica" das actividades complementarias dos centros, que deben ser informadas, precisamente, a Inspección.
 

Neste contexto, o BNG pide tamén "responsabilidades" á superior directa de Prado Cova, que é a directora xeral de Ordenación e Innovación Educativa, Judith Fernández, porque entre ambos "asinan as instrucións de control ideolóxico" coas que o Goberno galego "pretende exercer a censura", afean os nacionalistas.

Por todo iso, o Bloque apela directamente ao presidente da Xunta, Alfonso Rueda, e ao conselleiro de Educación para advertir que manter ao subdirector xeral no cargo é "unha mostra máis" de que o PP galego "quitouse a careta e abraza abertamente os postulados da ultradereita, utilizando a educación para impor a ideoloxía máis reaccionaria".