O PSdeG ve "incompetencia" da Xunta en financiamento local tras o informe de Consello de Contas

O Grupo Parlamentario Socialista acusou ao Goberno galego de "incompetencia" tras o "demoledor" informe do Consello de Contas sobre o financiamento local que sitúa a Galicia como a comunidade co "peor índice de execución do orzamento de ingresos locais de todo o Estado".

Así o denunciou nun comunicado a viceportavoz parlamentaria do PSdeG Elena Espinosa, quen denunciou a "falta de apoio" da Xunta aos concellos galegos tras coñecer o informe deste organismo fiscalizador sobre a conta xeral das entidades locais correspondente ao ano 2023.

A deputada Elena Espinosa sostivo que o documento "confirma punto por punto" o que o PSdeG leva anos denunciando: "a Xunta non executa, non xestiona e obriga aos concellos a cubrir servizos sen financiamento".

O PSdeG sinalou que o informe de Contas sitúa a Galicia á cola do Estado en execución orzamentaria por parte das entidades locais, cunha media do 66,57%.

A socialista indicou que as deputacións e as entidades locais menores presentan os peores rexistros, con taxas de execución do 51,88 % e do 57,06 %, respectivamente, mentres que os concellos de entre 10.001 e 20.000 habitantes e as mancomunidades mostran unha maior capacidade de xestión, superando o 76%.

Ademais, conforme apuntou, o documento alerta da elevada dependencia das subvencións, que representa o 23,18% dos ingresos locais e chega ao 47,33% nos municipios máis pequenos.

A isto, sumou a "escasa autonomía fiscal" das entidades locais galegas -Galicia sitúase no posto 12 de 15- e un dos "peores datos do Estado" en canto ao período medio de cobro.

"Estamos ante un modelo de financiamento local profundamente inxusto, no que a Xunta non exerce as súas competencias e deixa que os concellos asuman funcións que non lles corresponden, sen ningunha partida específica", lamentou a socialista.

Ademais, conforme indicou, o documento constata que os concellos están a soportar cada vez máis presión competencial, especialmente no ámbito dos servizos sociais, cun gasto por habitante que alcanza os 206 euros, por encima da media estatal.

"Ese esforzo é dos concellos, non da Xunta, que continúa sen transferir recursos nin asumir responsabilidades", afirmou a portavoz do Grupo Socialista na Comisión do Consello de Contas.

Espinosa insistiu en que "a baixa execución orzamentaria non é só un dato técnico: é a proba de que o Goberno de Rueda falla no esencial, que é garantir a autonomía e a viabilidade dos concellos".

Por último, concluíu reclamando "un cambio de rumbo inmediato" e un "novo marco de financiamento local que acabe co abandono institucional ao que o PP somete aos gobernos municipais".