O PSdeG acusa á Xunta de "directamente mentir" sobre a súa responsabilidade na paralización do sector eólico

A portavoz de Industria do Grupo Socialista, Patricia Igrexas, acusou á Xunta de dar "escusas de mal pagador e directamente mentir" para "esconder a súa responsabilidade directa" na paralización do sector eólico en Galicia.

Deste xeito, Igrexas cualificou de "intolerable" que o Goberno galego "prefira atacar" ao TSXG e ao Goberno central para "esconder a súa propia incompetencia ao incumprir coa distribución de zonas protexidas".

Así mesmo, a socialista referiuse ás "declaracións vergoñosas" da conselleira de Medio Ambiente e Cambio Climático, Anxos Vázquez, para "esconder a súa propia incompetencia debaixo da alfombra e mentir ao dicir que a totalidade da superficie galega estaba protexida contra a implantación de eólicos".

Neste contexto, Igrexas emprazou á Xunta a "facer os deberes" e "cumprir" coa zonificación e planificación territorial de zonas protexidas para implantar os parques eólicos. Ademais, aseverou que o que debe facer o Executivo galego é "ter en conta o Marco de Acción Prioritaria para a ampliación da Rede Natura 2000 en Galicia seguindo a normativa comunitaria".

Con todo, os socialistas puntualizaron nunha nota de prensa que a zonificación de sensibilidade ambiental está a aplicarse desde o ano 2021 en todo o Estado e lembrou que comunidades autónomas gobernadas polo PP adaptaron as súas lexislacións, "por iso están a adiantar a Galicia".

Para concluír, Igrexas detallou que esta situación deriva dun "fallo" na política enerxética da Xunta e na súa decisión de "paralizar o concurso eólico en 2009", neste sentido, sinalou que se deixaron fóra do desenvolvemento eólico 2.325 MW e máis de 5.000 millóns de euros en investimentos.