O PP afasta, por agora, a moción de censura en Santiago a pesar da expulsión dos díscolos do PSdeG

A dirección federal do Partido Socialista (#PSOE) decidiu expulsar provisionalmente a catro concelleiros do Concello de Santiago de Compostela no medio dun conflito que ameaza con tensar aínda máis o panorama político na capital galega, onde o Bloque e Compostela Aberta gobernan en minoría co apoio desde fóra do executivo do dividido grupo socialista. Gonzalo Muíños, Milagres Castro, Marta Álvarez e Mercedes Rosón foron apartados temporalmente da súa militancia debido ao seu enfrontamento coa dirección local do partido, que lidera o mozo Aitor Bouza.

A crise se agravá así aínda mais, pero o certo é que leva larvándose desde a derrota electoral das pasadas eleccións. Tras a saída do ex-alcalde Xosé Sánchez Bugallo cara o Senado, o aparello do partido seleccionou a Bouza para recompor o PSOE. Bouza esperaba que algún das veteranos concelleiras da era Bugallo dimitise para facerlle un sitio no Pazo de Raxoi. Como non foi así, isto explica en parte o conflito persoal que foi escalando até pór ao grupo municipal moi preto da escisión. 

Hai que ter en conta, ademais, que a vida do PSOE local tamén está marcada pola ameaza que supón a instrución do caso Desproi. Aínda que ningún dos edís da pasada lexislatura que seguen na presente está imputado, o PP no seu día denunciounos a todos. 

Disputas internas pola portavocía municipal

A Comisión Executiva Federal do PSOE confirmou a expulsión de Rosón, Castro e Álvarez por negar a designar como portavoz municipal ao candidato proposto pola dirección local, Gumersindo Guinarte. Pola súa banda, Gonzalo Muíños, que xa fora sancionado con 18 meses de suspensión de militancia, foi igualmente apartado por non acatar esta decisión e manter como portavoz contra o criterio do partido.

Dado que a medida ten carácter provisional, os seus efectos no pleno do Concello son limitados por agora . O secretario do Concello solicitou ao PSOE a resolución completa do expediente dos catro concelleiros para confirmar si a expulsión será definitiva, un detalle crave para decidir si pasan a ser edís non adscritos. 

Sen este paso formal, os concelleiros continúan sendo parte do grupo socialista a nivel institucional pero parece cantado que acabarán formando un grupo propio ou sendo declarado non adscritos.

En todo caso, os afectados insisten en que a sanción é nula. Os catro concelleiros manteñen que eles son os lexítimos representantes do partido no Concello, pois son maioría, catro fronte a dous aliñados coas teses da Agrupación local.

O documento asinado polo secretario conclúe que só os edís con expulsión definitiva do partido adquiren a condición de non adscritos, o que podería alterar a configuración do pleno no futuro. 

Así que por agora o PSOE ten seis votos no pleno, polo que ao PP non lle dan os números para unha hipotética moción de censura contra Goretti Sanmartín. En todo caso, por agora o plan dos conservadores é desgastar á alcaldesa do Bloque e aos socialistas, conscientes de que agora mesmo sería moi complicado exporlle un pacto aos concelleiros que, previsiblemente, acabarán sendo expulsados do PSOE. 

Verea:  "Están a usar Compostela como un xoguete. Este é o prezo que está a pagar Santiago cando unha persoa con seis concelleiros de 25"

"Toda a cidade está a ser testemuña deste triste espectáculo onde os tres partidos están a usar Compostela como un xoguete. Este é o prezo que está a pagar Santiago cando unha persoa con seis concelleiros de 25 quere gobernar custe o que custe", censurou hoxe o líder do PP Borja Verea.

Verea non parece moi polo labor de falar de moción de censura por agora.  reiterou que quere ser alcalde "porque así o deciden os santiagueses e non collendo atajos".

"Hai unha realidade, eu gañei as eleccións por goleada a BNG, Compostela Aberta e PSOE, pero recoñezo que a alianza deste tres partidos gañoume as eleccións. Tocarame en 2027 darlle a volta", subliñou.

Tensións rexionais e divisións internas no PSdeG

A crise do PSOE en Santiago podería ter repercusións fóra da cidade, especialmente en municipios próximos. Algúns alcaldes socialistas, como Blas García, rexedor de Ames, mostraron o seu descontento coas expulsións. Nunha mensaxe na rede social 'X', García expresou o seu desacordo coa decisión e defendeu aos concelleiros afectados: “Uns poucos poden gañar unha batalla, pero todos perdemos a guerra”.

Mentres tanto, a dirección galega do PSdeG, encabezada por José Ramón Gómez Besteiro, optou por un perfil baixo nesta crise, limitar a expresar o seu respecto polas decisións tomadas polo partido. Esta aparente pasividade -que na práctica supón un apoio ao bando de Bouza e pon ao catro díscolos entre o eixo e a roda- foi criticada por algúns políticos da comarca, preocupados porque hai moitos composteláns que se mudaron aos seus municipios polo que os vaivéns do PSOE compostelán poden ter repercusión nos seus concellos.
 

Cunha alcaldesa do BNG gobernando cunha fráxil maioría e un PSOE fracturado, Santiago de Compostela diríxese cara a unha encrucillada política. Se o partido expulsa finalmente a Muíños e aos seus tres apoios, canto tardará o PP en chamalos para explorar a posibilidade dunha moción de censura?