Sogama: o "único culpable" da subida do canon é o Goberno polas súas "decisións unilaterais"

O presidente de Sogama, Javier Domínguez Lino, sinalou que o "único culpable" da subida do canon que a empresa pública propón para 2025 é do Goberno central polas súas "decisións unilaterais".

Así o fixo en declaracións á Radio Galega recollidas por Europa Press, onde criticou que o Executivo que dirixe Pedro Sánchez "non reacciona ás súas peticións nin rectifica" as medidas aplicadas o pasado ano, que foron as que "lesionaron gravemente" as contas da empresa pública.

Por tanto, "ven na obrigación" de realizar unha nova actualización do canon para "garantir a viabilidade da empresa pública".

Preguntado sobre as reaccións tras o anuncio da subida, Domínguez Lino mostrouse "bastante sorprendido" por escoitar varias "declaracións abruptas" dos alcaldes do PSOE e do BNG.

"Foron eles quen aprobaron a lei de residuos e solos contaminados, que establece os novos impostos estatais á vertedura de incineración que nos afectan en 39 euros o custo de incremento do canon de Sogama", detallou.

Por tanto, continuou, "equivócanse" á hora de buscar un culpable. "Non é nin a Xunta, nin Sogama, senón o Goberno central coas súas decisións unilaterais", afirmou.

En canto á aplicación da subida, o presidente de Sogama explicou que "están a pechar" o orzamento do ano 2025 e que a Xunta, este ano, para "non ferir máis" as contas dos concellos achegou un Fondo de Cooperación Local adicional de "12 millóns de euros".

Neste sentido, indicou que estudan a posibilidade, de face aos orzamentos do 2025, en que cantidade pode asumir a Xunta para "axudar aos concellos".