Jácome devolve a xogada e pide agora unha moción de censura na Deputación de Ourense contra o PP

Democracia Ourensá replicou ás propuesas de moción de censura no ámbito municipal emitindo un comunicado aos medios de comunicación no que anuncia que a formación enviou unha proposta aos dirixentes do Partido Socialista e do Bloque Nacionalista Galego na Deputación de Ourense para "buscar unha alternativa" á presidencia do organismo provincial a través dunha "moción de censura".

O líder da formación, Gonzalo Perez Jacome, responde así á proposta exposta polo PSOE aos grupos da oposición no concello -#PP e BNG- para darlle "un cambio de rumbo á cidade". Expono o propio Pérez Jácome no comunicado, no que asegura que "este movemento" obedece a unha resposta e "é análogo" á resposta desta semana do PP ao PSOE e ao BNG con respecto ao concello de Ourense.

Jácome asegura que se ve avalado para iso por "o que apostilou o presidente Luís Menor avalando a postura do Partido Popular", deixando a porta aberta a un acordo cos socialistas.

Jacome xa deixara entrever que podería chegar a esta situación no pleno extraordinario deste xoves, onde a portavoz do PP, Sonia Ogando, ratificou a postura do seu partido de estar dispostos a falar "si recibimos unha proposta formal, real e sólida". "Sonia, o mesmo dígolle eu ao Bloque e ao PSOE na Deputación, cando queiran, se están dispostos a falar dunha alternativa seria, tamén poden falar comigo", ameazou entón o alcalde e líder de DO a bancada popular, en referencia ao pacto co PP de que cada formación goberne onde foi a lista máis votada.

Agora faio oficial cun escrito no que anuncia que DO estaría disposto a tratar a tres bandas un novo rumbo na deputación de Ourense, "aínda que con liñas vermellas", subliñando que "dicir como dixo o PSOE que non debe haber liñas vermellas é mentir aos cidadáns, porque é case imposible que non existan condicionantes".

"Estamos abertos a unha reunión cando PSOE e BNG consideren, antes ou inmediatamente despois das eleccións europeas", finaliza o comunicado, que se coñeceu mentres se desenvolvía o pleno ordinario da Deputación Provincial.

NEGATIVA DO BNG
O único partido que respondeu foi o Bloque, que valorou non só a proposta de Jácome na Deputación, senón tamén a de PSOE no concello.

Os nacionalistas reiteraron a postura que xa esgrimira o portavoz municipal, Luís Seara, ao longo desta semana. Lembran que o "#PP fixo a Jácome alcalde hai cinco anos" e que, "a pesar de todo o que sucedeu no mandato" anterior "volveron facelo alcalde hai un ano". Cren por tanto que "volverán facelo se o necesitan dentro de tres".

Por iso, sinalan que "o que ten que facer o PP para ser crible é que o seu máximo responsable, Alfonso Rueda, así como a súa secretaria xeral, Paula Prado, rexeiten publicamente o acordo de investidura e pidan desculpas aos veciños de Ourense".

Con respecto á proposta de Gonzalo Pérez Jácome ao resto de grupos políticos na deputación, o portavoz do BNG na institución, Bernardo Varela, falou na mesma liña: "Jacome terá que romper o acordo e pedir desculpas por facer a Luís Menor presidente", indican.

Todo iso porque para a formación "a maior pedra, que leva preto de corenta anos afectando a Ourense e facendo que cada vez sexa máis pequeno e irrelevante, chámase Partido Popular".

"Non imos facer alcalde nin tenente de alcalde a ninguén do PP, porque o BNG é a antítese a todo o que representan os populares", dixeron. "Levamos tres anos falando de posibles mocións de censura e alimentando expectativas que non son reais", sinalan nun comunicado, no que aseveran que "non imos perder tempo en alimentar o ruído que outros pretenden crear", e no que subliñan que "nada do que está a pasar estes días é serio". "Fume e nada máis, o único real e certo é o acordo asinado en xuño 2023 entre PP e Democracia Ourensá", conclúen.