Galicia contén os seus incendios -estabilizados os da Gudiña e Laza, extinguido o de Arbo- mentres as chamas arrasan Portugal
O país veciño vive unha situación de emerxencia con tres mortos, casas destruídas polas chamas, numerosas estradas cortadas e 40 feridos nunha vaga de incendios que consumiu en dous días a mesma superficie que ardera durante todo o ano. Todo un aviso para o que, potencialmente, pode pasar en Galicia se se dan as condicións máis perigosas -moitos días de máis de trinta graos de temperatura, fortes ventos e pouca humidade-, aínda que por agora o traballo das brigadas foi suficiente para conter os grandes incendios deste verán relativamente rápido.
A Xunta dá por estabilizado, aínda sen controlar, o incendio no municipio da Gudiña (Ourense), parroquia de Pentes, despois de queimar 150 hectáreas.
Segundo a última actualización da Consellería do Medio Rural na mañá deste martes, o lume da Gudiña quedou estabilizado na medianoite entre o luns e o martes. Na extinción traballaron 10 helicópteros, oito avións, 20 brigadas, nove motobombas, oito axentes, catro pas e dous técnicos. Iniciouse ás 13,18 horas do pasado luns.
Por outra banda, o incendio rexistrado no concello de Arbo (Pontevedra), parroquia de Mourentán, quedou extinguido na noite do luns despois de calcinar 22,7 hectáreas --a maioría de monte arboledo e 1,8 hectáreas de raso--. Iniciouse na noite do domingo e nas tarefas participaron: dous helicópteros, 24 brigadas, 23 motobombas, sete axentes, dúas pas e tres técnicos.
Mentres, continúa estabilizado, aínda sen controlar, o lume no concello ourensán de Laza, parroquia de Trez, o cal se iniciou na tarde do pasado domingo. Afecto a unhas 60 hectáreas. Mobilizáronse sete helicópteros, catro avións, 30 brigadas e 18 motobombas, entre outros medios.
Escribe o teu comentario