Unha bandeira arcoíris artesanal, primeiro símbolo do compromiso do Concello da Rúa co colectivo LGTBIQ

En ocasións, pequenos xestos, aínda que improvisados, marcan a diferenza. Algúns, aínda que simbólicos, poden ser alento ou exemplo para moitas persoas e só decatámonos do seu alcance e transcendencia pasado o tempo, cunha maior perspectiva. Na Rúa, aínda que a algún poida parecerlle que non, este luns foi un día histórico, xa que por primeira vez o consistorio da localidade, a casa de todos os veciños, luciu unha bandeira arcoíris no seu balcón. Algo que hoxe é en grao sumo habitual en moitos Concellos, pero que na Rúa é un fito e todo un acontecemento, en vésperas do I Pride de Valdeorras, que se celebrará este venres na Rúa e O Barco.

O máis curioso deste acontecemento é que na Rúa non parecían nin moito menos preparados para esta ocasión. Esta é a semana do Orgullo, xa que o 28 de xuño -o vindeiro mércores- celébrase o Día Mundial do Orgullo LGTBIQ. No entanto, no municipio ourensán, que até hoxe non reivindicara como merece esta data que pon en valor a loita do colectivo pola conquista de moitos dereitos fundamentais, non había a man unha bandeira coas seis cores. 

Foron dous membros da organización da festa do Orgullo en Valdeorras os que tiveron que inxeniársas para buscar unha solución. "Como era a primeira vez tivo que ser algo improvisada. Fixémola os organizadores a partir dunha saba vella", comenta Xabier, un dos responsables desta pequena conquista.

"Isto é algo moi simbólico para o concello e non ten precedentes, xa que nunca se colgou unha bandeira do Orgullo no balcón do Concello", agrega. Así, e desde hoxe, a bandeira arcoíris adorna a balconada xunto ás bandeiras da Unión Europea, a de España e a de Galicia. Unha bandeira con todas as súas cores, pequena e modesta, pero colocada con moito orgullo.