Deteñen a unha septuaxenaria que tentou coar droga no cárcere de Monterroso durante unha visita

A Garda Civil de Lugo detivo a unha muller de 71 anos acusada dun delito de tráfico de drogas, tras sorprendela cando tentaba introducir droga no cárcere de Monterroso aproveitando unha visita a un interno.

En concreto, informou o corpo, a muller acudía a visitar a un interno no penal e entre as súas posesións levaba cannabis, que lle foi intervido. Na detención colaborou tamén o persoal técnico de Institucións Penais.

Por outra banda, a Garda Civil investiga a un mozo de 19 anos que causou diversos danos nun vehículo estacionado no termo municipal de Meira.

Foi a propietaria do vehículo a que observou como danaba o turismo e recriminoulle os seus actos. A continuación, foi agredida polo investigado, á vez que a insultaba con alusións ao seu lugar de orixe.