Así soa o novo disco de Tanxugueiras e así foi a presentación de Ou Cuarto en Obradoiro

A Praza do Obradoiro converteuse a noite do martes 12 de maio no escenario dun dos momentos máis notables da música galega deste século. Tanxugueiras, o grupo formado por Aida Tarrío e as irmás xemelgas Olaia e Sabela Maneiro, non se subiu a un escenario convencional para presentar o seu novo traballo. No seu lugar, despregou unha instalación artística creada exclusivamente para esa data e cuberta con cortinas fronte á fachada da Catedral, que non se descorrieron até ben entrada a tarde.

Durante máis dunha hora, o público que foi chegando á praza foi testemuña de algo desconcertante: as tres artistas, en silencio, xogaban ás cartas, tendían sabas e compartían labores cotiáns dentro dese espazo pecho. Unha performance que reproducía escenas da vida doméstica feminina e que foi recibida coa perplexidade lóxica de quen non esperaban ese arranque. "A que hora tocan?" ou "Pero non era ao oito?" escoitábase entre o público máis despistado, e mesmo algún chegou a non recoñecelas ao pasar xunto a elas.

O silencio rompeuno Adelina, que armou unha foliada na praza con pandeireteiras, convertendo ás propias Tanxugueiras en espectadoras. Foi entón cando, cunha conta atrás, os tules que cubrían o escenario levantáronse e arrincou escóitaa colectiva de 'Ou Cuarto', o novo álbum do grupo, horas antes da súa publicación nas plataformas dixitais o 13 de maio.

A propia Aida Tarrío advertira días antes a través das redes sociais que o que ía suceder no Obradoiro "non sería un concerto, senón algo máis especial". E así foi. A proposta apostou por un formato experiencial pensado para conectar música contemporánea, patrimonio visual e creación artística nun espazo único. A instalación tivo carácter efémero e non formará parte da futura xira nin de presentacións posteriores do álbum.

Santiago de Compostela non só foi a primeira cidade do mundo en escoitar 'Ou Cuarto' en directo antes do seu lanzamento oficial, senón que tamén celebrou xunto ao grupo o seu décimo aniversario sobre os escenarios. Unha celebración, con torta de aniversarios inlcuida, que deu máis simbolismo a unha  noite na que a praza do Obradoiro —meta dos camiños europeos que historicamente buscaban un vínculo máis aló do tempo— serviu de marco para un proxecto musical que, polo ouvido en Ou Cuarto, segue mesturando raíces ancestrais do folk galego con sons contemporáneos como o pop, a música urbana ou o dance.

Dez anos de revolución musical

Tanxugueiras naceu entre Ribeira, onde ten as súas raíces Aida Tarrío, e Teo, localidade de procedencia das irmás Maneiro. Desde os seus comezos, o grupo apostou por reivindicar o papel da muller e a normalización do galego na música actual, combinando pandeiretas con produción electrónica nunha proposta que resultou disruptiva no panorama musical español.  O nome do grupo provén dunha microtoponimia vinculada aos tejones.

O seu salto definitivo ao gran público chegou co Benidorm Fest de 2022, cando a súa canción Terra converteunas nas favoritas do público para representar a España en Eurovisión, aínda que finalmente non foron seleccionadas. A partir de aí, a súa proxección non deixou de crecer, con actuacións en festivais internacionais e unha base de seguidores que desborda fronteiras lingüísticas e xeneracional.

A xira de 'Ou Cuarto' percorrerá escenarios de toda España e chegará tamén ao estranxeiro. Nos próximos meses están confirmadas datas en Vecindario (23 de maio), Bilbao (13 de xuño), Xaén (11 de xullo) e o festival WOMAD de Wiltshire no Reino Unido (23 de xullo). No outono regresan con paradas na Coruña —a única data galega, o 17 de outubro no Coliseum—, León (23 de outubro) e Valladolid (24 de outubro). En 2027 continuarán con concertos en Madrid (9 de xaneiro na Sala Riviera), Murcia, Valencia, Zaragoza, Gasteiz e Barcelona, entre outras cidades.

Para quen non puideron estar no Obradoiro o martes pola noite, 'Ou Cuarto' xa está dispoñible desde este mércores 13 de maio en todas as plataformas de streaming. 

Aquí unha mostra: