Buque espía ruso capaz de cortar cables submarinos, o Yantar, vixiado preto de Galicia

A Mariña de Portugal confirmou hai uns días que estivo a vixiar de cerca ao yantar durante a súa navegación fronte ás costas continentais lusas.  Onte foi a Mariña do Reino Unido quen detectou á embarcación pasando pola Canle da Mancha.  

Por tanto, aínda que a Mariña de España non o confirmou -adoita tardar varios días en facer público este tipo de seguimentos- é probable que barcos da base de Ferrol tamén o controlarán durante o seu tránsito por augas da zona económica exclusiva española. 

Galicia e a súa rede de cables submarinos

O paso do Yantar fronte a Galicia ten unha importancia especial debido á presenza de máis dunha ducia de cables submarinos que atravesan o Oceano Atlántico fronte ao país, vitais para as telecomunicacións internacionais.

A Mariña lusa, coordinada polo Centro de Operacións Marítimas, despregou varios buques, como a fragata NRP D. Francisco de Almeida e o patrulleiro NRP Setúal, para monitorear os seus movementos. Previamente, o Reino Unido tamén detectou ao navío transitando pola Canle da Mancha, onde foi escoltado polo buque HMS Somerset. Alí atópase o Yantar, segundo os portais de seguimento vía satélite, que son capaces de informar do navío que, oficialmente, non é un barco militar.

O Reino Unido foi especialmente duro coa travesía do Yantar. O secretario de Defensa, John Healey, advertiu que "a miña mensaxe ao presidente Putin é claro. Sabemos o que estades a facer e non dubidaremos en adoptar medidas enérxicas para protexer a Gran Bretaña".

Precedentes e advertencias internacionais

Estes seguimentos de navíos de guerra da OTAN a barcos rursos non son novos, pero cobraron maior relevancia e frecuencia  desde os incidentes rexistrados no Mar Báltico, onde se reportaron danos en infraestruturas submarinas clave. A OTAN, en resposta a estas ameazas, reforzou a súa vixilancia nas augas europeas, incluíndo o despregamento de aeronaves de patrulla marítima como o P-8 Poseidon.

O historial do Yantar inclúe episodios recentes como o seu escolta fóra do Mar de Irlanda en novembro pasado, tras ser detectado preto de cables que transportan datos de grandes tecnolóxicas como Microsoft e Google. Hai que ter en conta que este navío pode operar somerxíbeis da clase Konsul, capaces de operar até a 6.000 metros de profundidade.

O Yantar provén do Mediterráneo Occidental, onde un mercante ruso, en teoría civil, sufriu varias explosións durante a súa navegación, que terminaron por afundilo. Rusia enviou ao Yantar a participar nos labores de investigación e recuperación de material, que desembarcou no porto de Alger. Cumprida a súa misión, suponse que volve á súa base de Severomorsk, no Ártico.