Condicións extremas para vixiantes de seguridade: cartóns contra o frío no inverno; sen auga no verán

Vixiantes de seguridade obrigados a tirar de mantas e cartóns para pasar o inverno. Esa é a estampa que se atopaban os viaxeiros na Estación Intermodal de Ourense o pasado mes de xaneiro, cando as temperaturas alcanzaban varios graos baixo cero. As xélidas condicións que teñen que soportar estes profesionais teñen o seu contrapunto nas sufocantes xornadas que soportan no verán, en postos onde non dispoñen nin de auga para facer fronte ás ondas de calor. Estes extremos foron levados por FESMC-#UXT ante a Xustiza, que agora fallou xudicialmente contra Grupo Control, empresa contratada por Adif para a seguridade do recinto. 

DENUNCIAS E INSPECCIÓNS

Non foi un percorrido sinxelo até chegar á multa de apenas 5.000 euros anunciada onte contra Grupo Control nunha sentenza onde se recalca que a sanción está motivada "por expor aos vixiantes a temperaturas de até –3 °C, recoñecendo a falta de protección térmica e dando plena validez á actuación inspectora". Outros sindicatos, como a Federación de Traballadores de Seguridade Privada da Unión Sindical Obreira (FTSP-USO) tamén denunciou as precarias condicións dos profesionais ourensáns. 

Unha inspección que ten a súa raíz hai case dous anos, en agosto de 2023, cando UXT rexistrou a primeira denuncia ante Inspección de Traballo de Ourense logo de constatar as condicións da estación de tren da cidade termal. Na queixa, destaca UXT, detallábanse cuestións como a falta de separación de vestiarios por sexo, entre outras carencias graves. 

A visita de Inspección demorouse até finais de novembro dese ano, "recollida en dilixencia oficial asinada por unha inspectora de Traballo e unha subinspectora de Seguridade e Saúde Laboral", constata o sindicato. Froito desa visita, emitiuse un expediente onde se esixía realizar de maneira "inmediata" unha "avaliación termohigrométrica", ademais de anotar "graves deficiencias estruturais e sanitarias" pola que se procedeu á "esixencia formal de correccións". 
 

"Tras o seguimento das actuacións, e tras unha segunda denuncia presentada polo sindicato o 27 de decembro de 2023, a Inspección de Traballo dita unha segunda resolución clave", di o sindicato sobre o "procedemento sancionador formal por incumprimento en condicións térmicas extremas, segundo o artigo 14 da Lei de Prevención de Riscos Laborais" en maio do ano pasado. 
 

Agora, en xullo de 2025, é cando o Xulgado do Social núm. 1 de Ourense confirma os 5.000 euros de sanción a Grupo Control, grazas, asumen desde UXT, ao "seguimento continuo e a presión sindical" durante estes últimos anos. De feito, en xuño de 2024 rexistrouse unha denuncia por "falta de auga potable" e polas temperaturas, entón sufocantes, ademais da denuncia presentada en xaneiro polas temperaturas glaciais e unha cuarta denuncia "por incumprimento persistente". 

De igual forma, o incumprimento de Grupo Control irían máis aló dos límites da cidade dás Burgas e chegarían até A Gudiña, onde o pasado mes de novembro rexistrouse unha denuncia máis polas "temperaturas irregulares" do centro de traballo xestionado por Grupo Control "baixo contrato con Adif". 
 

REPROCHE A ADIF

O tirón de orellas, nese sentido, vai tamén dirixido a Adif, pois nos expedientes Inspección de Traballo declarou a Adif como "responsable subsidiaria" ao ser "titular da instalación e contratante de Grupo Control". "Esiximos a adopción inmediata de medidas pre ventivas estruturais e sancións complementarias se fose necesario", agregan desde UXT.

"Todo isto non é froito do azar. É resultado dunha acción sindical seria, documentada e persistente. Desde UXT activamos o proceso que acabou cunha sanción e unha sentenza histórica. Seguiremos vixiantes para que ningún traballador teña que seguir soportando o frío ou a calor extremos sen protección. Esiximos respecto e condicións dignas".