A planta de Nova Pescanova en Arteixo, declarada proxecto industrial estratéxico

O Consello da Xunta deste luns aprobou a declaración como proxecto industrial estratéxico de Galicia a nova planta de elaboración de produtos do mar impulsada por Nova Pescanova en Arteixo (A Coruña).

Tal como informou o Goberno galego, a iniciativa suporá un investimento duns 16 millóns de euros e suporá a creación de entre 50 e 75 empregos directos, ocupando nove parcelas da fase C do polígono de Morás.

Cunha superficie total de máis de 25.000 metros cadrados, ademais da nave tamén contará cunha estación depuradora de auga residuais. Trátase así do 15º proxecto industrial estratéxico aprobado pola Xunta.

"A planta estará equipada con todos os elementos necesarios para levar a cabo a produción integral de produtos do mar, desde a clasificación e cocción, pasando pola conxelación, o envasado e o almacenamento dos produtos terminados", subliñou o Executivo autonómico.

TRASLADO DE ESPECIES MARIÑAS

Noutra orde de cousas, o Goberno galego tamén deu o visto e prace á norma reguladora do traslado de especies mariñas, dando así resposta a unha "demanda reiterada" do sector e cumprindo coa normativa europea que establece os antecedentes normativos para o desenvolvemento desta disposición autonómica.

"Desta maneira, a Consellería do Mar dota ao sector dunha ferramenta xurídica necesaria, pois garante a calidade e o control da actividade, tanto á administración pesqueira como aos consumidores. E é que o valor no mercado das capturas tamén depende de que cheguen vivas e en óptimas condicións á lonxa para a súa posta en venda", subliñou a Xunta.

Así, facilitará o rastrexo dos lotes mediante a identificación das actuacións de desprazamento, identificándoas a través da creación de tres documentos: declaración de traslado, de recollida e de anulación.

ESTUDO VOLANDEIRA CSIC

Por outra banda, o Consello tamén autorizou a firma dun convenio de colaboración entre a Consellería do Mar e o Consello Superior de Investigacións Científicas (#CSIC) para a realización do proxecto Volaria, que pretende estudar os factores que afectan á volandeira e que impiden a súa comercialización na Ría de Vigo.

Esta acción prolongará os seus traballos até 2027, cun investimento autonómico de 98.000 euros. A investigación pretende coñecer si existe unha relación entre o tamaño ou a idade dos organismos e a concentración de chumbo nos seus tecidos.