Ampliado até o 18 de agosto o prazo para solicitar axudas a establecementos termais

O prazo para solicitar as axudas a establecementos termais amplíase até o 18 de agosto, así o recolle o Diario Oficial de Galicia, que establece que as persoas interesadas en solicitar algunha das dúas convocatorias de subvencións previstas terán un mes máis para presentar o seu proxecto.

Trátase de dúas convocatorias enmarcadas o Plan de Turismo Termal de Galicia e que teñen unha contía conxunta de case 8 millóns de euros. A primeira delas céntrase na posta en marcha de proxectos tractores que teñan un "efecto transformador" no sector turístico de establecementos na categoría de hoteis balneario e hoteis talaso da comunidade, para así ampliar a oferta existente de aloxamentos turísticos deste tipo.

Esta convocatoria inclúe dúas liñas de axudas, unha primeira centrada na construción, reforma ou rehabilitación sostible de edificios e na adaptación de infraestruturas ou instalacións para a posta en marcha dun novo establecemento e a destinada aos sistemas de enerxías renovables e economía circular no novo establecemento.

En total, hai previsto un crédito de 1,7 millóns de euros, dos que 1,4 céntranse na primeira liña e 300.000 euro na segunda, segundo explicou a Xunta nunha nota de prensa.

Doutra banda, a segunda convocatoria subvenciona a rehabilitación ou reforma de establecementos turísticos coa categoría de hoteis balneario e hoteis talaso de Galicia que xa estean en funcionamento.

Neste caso diferéncianse tres liñas de gasto subvencionable para cada proxecto. A primeira céntrase na propia reforma ou rehabilitación das instalacións, mentres que a segunda se destina a medidas de eficiencia enerxética e economía circular nas infraestruturas termais.

Con todo, a terceira liña busca fomentar a difusión da cultura termal galega e do turismo de saúde, a través de iniciativas como xornadas, publicacións e programas. As axudas están dotadas con 6,085 millóns de euros, que se distribúen nas tres liñas.