Naturgy inviste máis de 220.000 euros para mellorar a calidade da subministración eléctrica en Porto do Son

UFD, a distribuidora eléctrica de Naturgy, investiu máis de 220.000 euros na mellora da subministración eléctrica na parroquia de Baroña, no municipio coruñés de Porto do Son.

En concreto, a compañía construíu no lugar de Abuín unha liña de media tensión subterránea de 613 metros con orixe nun novo apoio e final nun novo centro de transformación, así como dúas novas liñas de saída en baixa tensión. Así mesmo, adecuouse a rede de baixa tensión existente na zona.

A compañía inclúe cada ano no seu plan de investimentos actuacións e iniciativas para potenciar as infraestruturas de subministración de enerxía eléctrica e mellorar a rede de distribución eléctrica, especialmente en zonas rurais, contribuíndo así ao desenvolvemento económico destes territorios e á mellora das súas condicións de vida.

Para o delegado de UFD na provincia da Coruña, Emilio Castro, "o investimento realizado é unha proba máis do compromiso desta compañía co desenvolvemento enerxético de Porto do Son, xa que as actuacións realizadas aumentarán a capacidade da rede de distribución na parroquia de Baroña, ademais de mellorar a fiabilidade da subministración eléctrica e minimizar os tempos de resposta ante calquera incidencia en Abuín".