Altri e Greenfiber presumen de "canteira" formando a estudantes galegos...con vistas á factoría de Palas de Rei?

Aínda quedan moitos asuntos que resolver ata que Altri termine por instalar en Palas de Rei na factoría que pretende abrir na localidade lucense. O proxecto, considerado como unha bomba contra o medioambiente segundo plataformas ecoloxistas e organizacións veciñais, está moi vivo entre a opinión pública, onde a oposición crece a medida que se van coñecendo datos en torno ao consumo de auga que precisaría a súa actividade ou a cantidade de eucalipto que faría falta na planta. No entanto, estas polémicas non frean a Altri, que impulsa o proxecto GAMA en Galicia a través de Greenfiber, firmas que "sacan peito" presumindo dos mozos galegos que se están formando nestes momentos nas súas instalacións de Portugal.

ESTUDANTES DE ESO, FP E UNIVERSIDADE

Nestes momentos hai un nutrido grupo de estudantes, ben pertencentes ás modalidades de FP dual, coas que cursarán as súas prácticas de 6 meses na fábrica lusa, ou ben por medio da Escola de Verán con alumnos universitarios, de ESO ou de Formación Profesional, realizando a formación nunha das factorías do país veciño. Son, di a empresa, "plans de formación para mozos galegos", unha iniciativa que busca ter a man unha canteira de profesionais con vistas á apertura da planta en Palas de Rei. Dous destes estudantes son da facultra de Enxeñaría Química da USC. 

"É o segundo ano que participo na escola de verán de Altri, e gustaríame poder acudir o próximo ano para realizar as prácticas de grao. O ano pasado estiven na área de produción de pasta e leste no de recuperación de enerxía. A experiencia en ambos os casos foi moi positiva, tanto polo contacto co mundo laboral, cultura e valores do equipo onde estiven a me formar, como polos coñecementos prácticos apresos. Aínda que foi só un mes, permitiume coñecer de forma moi xenérica o proceso produtivo e a forma de traballo de Altri. Oxalá poida repetir a experiencia, mereceu a pena", di un dos estudantes galegos.

Nas prácticas de Celbi, en Figueira dá Foz, con acordos con centros como o CIFP Politécnico de Santiago ou o CIFP As Mercedes de Lugo, terminaron a súa formación nas áreas de Laboratorio e Mantemento tres estudantes da FP Dual. "Foi unha experiencia moi enriquecedora que me permitiu aprender un novo idioma e ampliar coñecementos do que estou a estudar. Os compañeiros de laboratorio apoiáronme moito e espero volver o próximo ano para seguir aprendendo", testemuña un deses colexiais.
 

PREPARANDO A súa CHEGADA A PAS?

As declaracións acompañan o comunicado emitido pola empresa, onde recapitulan os seus plans para o proxecto que capitanean en Palas de Rei, onde planean crear medio milleiro de empregos directos nunha fábrica "con réxime 'Non Stop' que funcione os 365 días do ano, polo que o persoal que participe no proceso produtivo terá establecido un horario de traballo a quendas rotativas, respectando os descansos establecidos pola lexislación vixente".

"O compromiso de Greenfiber é favorecer a formación e empleabilidad da comunidade onde está asentada, polo que priorizará a contratación de profesionais da comarca do Ulla, captando talento e novos galegos coa capacitación e experiencia necesaria para levar a cabo o proxecto", transmiten na súa nota. Ao tempo, "para aqueles candidatos que carezan desta formación", Greenfiber indica que xa están "a traballar na homologación dun certificado de profesionalidade". 

"Os profesionais que pasan a integrar no persoal da compañía participan nun ambicioso programa de acompañamento formativo teórico con estancia de prácticas nas instalacións de Portugal, que se complementará cun plan de formación individualizado para a adecuación entre persoa e posto", avanzan sobre esta iniciativa para "captar talento" co que arrincar "a fábrica de fibras téxtiles/téxtís que prevé pór en marcha en Palas de Rei e que situará a Galicia na vangarda dunha nova industria baseada na sustentabilidade e a innovación". De feito, nesta liña, hai meses que Greenfiber xa comezou a recibir currículos no portal aberto para recoller todas as candidaturas.