Megasa compra unha planta metalúrxica en Francia e afianza a súa expansión a pesar da incerteza económica

Metalurgia Galaica S.A. (Megasa) suma e segue. Aínda que a intuición podería indicarlle a moitos que este non é o momento para facer apostas arriscadas (inestabilidade dos mercados, incerteza económica, posibilidade dunha recesión...), desde a compañía afincada en Narón decidíronse a adquirir unha planta metalúrxica en Francia, unha compra capital nos seus plans de expandir o seu negocio no Vello Continente.

A gran siderúrxica galega, en mans da familia Freire, reta aos vaivéns das industrias electrointensivas cun proxecto que busca ampliar as súas fronteiras, empezando con incorporar á súa carteira de valores a Société Rouennaise de Déroulage, localizada á ribeira do Sena. A súa localización permítelle recibir grandes embarcacións, con até 10.000 toneladas.

A apenas 60 quilómetros do porto de Le Havre, en Normandía, a menos de tres horas en coche de París e preto doutras grandes urbes como Caen ou Ruan, a compra de SRD permitirá a Megasa mover até 150.000 toneladas de produtos no país veciño e conectar con relativa sinxeleza os envíos de Ferrol á súa nova planta no país galo.

No entanto, descoñécese canto foi o montante deste negocio. Despois de dar o salto a Portugal, onde ten importantes factorías en Maia ou Seixal, Megasa abre agora un novo horizonte que a catapulta ao corazón de Europa, ademais de dispor doutra fábrica en Zaragoza e un centro de distribución en Madrid . A actividade na firma galega parece en grao sumo solvente e o seu futuro asegurado, á vista de que cada vez suma máis operacións.