A cesta da compra repunta un 1,53% e rompe a tendencia á baixa

A cesta da compra volveu a encarecer en España tras varios meses de moderación. Segundo o último observatorio da OCU, os prezos subiron un 1,53% no último mes, a maior alza rexistrada desde xuño, nun contexto marcado polo repunte dos custos enerxéticos e dos carburantes.
 

O incremento rompe a tendencia descendente rexistrada anteriormente e confirma que a inflación alimentaria segue mostrando unha elevada volatilidade, con impacto directo no consumo dos fogares.

Froitas, carne e lácteos lideran as subidas

O encarecemento concentrouse especialmente nos produtos frescos. As froitas e verduras encabezan o aumento cun 5,78%, seguidas da carne e charcutería (3,24%), as bebidas (2,49%) e os lácteos (1,86%).

Entre os produtos básicos, destacan subidas significativas como a ensalada de bolsa (+22%), a cebola e os pementos verdes (+10%), o tomate e as mazás (+9%), así como o queixo fundido (+9%) ou o entrecot (+6%). Tamén o zume de laranxa experimentou un incremento relevante do 6%.

En contraste, algúns alimentos moderaron o seu prezo, como o café soluble descafeinado (-6%), as patacas (-5%) ou os macarrones (-4%), xunto a lixeiras baixadas en peras e xamón cocido.

Inflación acumulada e presión sobre os fogares

Máis aló do dato mensual, a organización advirte dun fenómeno estrutural: lvos alimentos son hoxe un 35,5% máis caros que hai tres anos. Este incremento acumulado segue condicionando a capacidade de compra das familias, especialmente en produtos básicos.

O impacto é especialmente acusado en partidas como a carne e o peixe, cuxo custo resulta difícil ou moi difícil de asumir para até un 40% dos fogares, segundo os estudos de solvencia da propia organización.

Petición de rebaixa do IVE para conter prezos

Ante este escenario, a OCU reiterou a súa petición ao Goberno para reducir o IVE dos alimentos básicos do 4% ao 0% mentres persista a presión inflacionista. A organización expón estender esta medida tamén á carne e o peixe, co obxectivo de aliviar o gasto das familias.

A proposta enmárcase nun contexto de debate sobre as políticas fiscais para conter o custo da vida, no que a alimentación segue sendo un dos principais focos de preocupación social.

Unha indicador clave do consumo cotián

O observatorio da OCU analiza mensualmente a evolución de prezos dun centenar de produtos habituais en grandes cadeas de distribución, o que permite medir con precisión o impacto real da inflación no día a día.
 

A última subida confirma que, a pesar dos episodios puntuais de descenso, a cesta da compra continúa sometida a tensións estruturais, ligadas tanto a factores internacionais como a custos internos de produción e distribución.