O PSdeG pide explicacións á Xunta por "irregularidades" en diferentes explotacións mineiras

A deputada socialista Patricia Igrexas acusou este domingo á Xunta de Galicia de soster un modelo mineiro “improvisado e cheo de irregularidades”, e anunciou o rexistro de iniciativas parlamentarias para esixir explicacións polos proxectos que acumulan conflitos xudiciais e ambientais. Segundo Igrexas, o Goberno galego fala de minería estratéxica, pero fomenta unha minería “sen plan nin control, que acaba nos tribunais”.

A parlamentaria subliñou que o #PSdeG “non está en contra da minería”, pero si do modelo actual, que carece de planificación e seguridade xurídica. Lembrou que Galicia segue sen contar cun Plan Sectorial de Minas aprobado, un documento que o Executivo autonómico ten a obrigación de desenvolver por lei e que debería servir para ordenar a actividade mineira. Na súa opinión, sen ese marco, a Xunta continúa autorizando explotacións “a golpe de expediente” e sen criterios homoxéneos.

Casos que reflicten un patrón común

Entre as explotacións con problemas citou Penouta (Viana do Bolo), San Finx (Lousame), A Gudiña e Touro-O Pino, casos que, segundo Igrexas, evidencian deficiente control ambiental e falta de transparencia. Nalgúns deles, os tribunais galegos han paralizado permisos ou esixido novas avaliacións de impacto ambiental, como ocorreu coa mina de Penouta.

O PSdeG rexistrou varias preguntas e interpelacións para obter información sobre as autorizacións e garantir o cumprimento estrito da legalidade ambiental. Os socialistas reclaman saber por que Galicia continúa sen un marco de planificación mineira, a pesar dos compromisos anunciados pola Xunta.