As granxas con entregas de leite en Galicia baixan por primeira vez das 5.000
O peche de granxas contrasta co prezo do leite, que se mantén á alza.
As granxas que realizan entregas de leite en Galicia baixan por primeira vez das 5.000 desde que hai rexistros, de forma que quedan en 4.987 en outubro de 2025, segundo os últimos datos publicados polo Ministerio de Agricultura.
Esta tendencia de perda de explotacións lácteas continúa nos últimos anos en Galicia. Segundo datos dun estudo da Fundación Juana de Veiga, en 2015 había máis de 9.500, polo que nun década deixaron de facer entregas preto da metade.
En outubro de 2024, a cifra de granxas de leite era de 5.310 na comunidade galega, polo que o recorte é de 324 no último ano, con base en datos do Ministerio.
No entanto, Galicia continúa como a principal comunidade leiteira ao rexistrar o 42% das entregas de toda España no acumulado do que vai de 2025, entre xaneiro e outubro.
Os PREZOS SEGUEN Á alza
Mentres, o prezo do leite que se paga a produtores segue á alza e alcanza os 52,4 céntimos por litro en Galicia en outubro (eran 52,1 céntimos en setembro).
No entanto, permanece por baixo da media española (53,5 céntimos). De feito, aumenta a brecha coa media española, que era de menos dun céntimo por litro o mes anterior.
A modo de exemplo, o dato galego é dous céntimos inferior aos 54,7 céntimos por litro que se paga na comunidade veciña de Asturias.
Escribe o teu comentario