Unha gasolineira de Cambados será a primeira en retirar o efectivo en Pontevedra

Unha estación Cepsa de Cambados será a primeira gasolineira da provincia de Pontevedra na que se poderá retirar diñeiro en efectivo desde a próxima semana. Isto será posible tras adherir ao convenio de colaboración asinado entre a Xunta de Galicia, Abanca e a Federación Galega de Estacións de Servizo (Fegaes).

Así o trasladou o Goberno galego con motivo dunha visita da conselleira de Economía e Industria, María Jesús Lorenzana, ao número 89 da Avenida de Vilagarcía. Esta medida está destinada a establecementos de concellos galegos con menos de 20.000 habitantes co fin de aumentar a súa carteira de servizos e facer fronte ao despoboamento.

O procedemento para a retirada do diñeiro é o mesmo que nunha compra con cartón en calquera comercio. O cliente terá que especificar a cantidade a extraer, pasará o cartón pola TPV e marcará o seu número secreto. Entón, o empregado da gasolineira faralle a entrega da cantidade pedida.

O Goberno galego estima que a implantación desta medida nos 290 concellos galegos con menos de 20.000 habitantes alcance nesta lexislatura uns 200 establecementos, a metade das que actualmente están adheridas á Fegaes.