O BNG esixe que se protexan os dereitos dos usuarios de aerolíneas en relación ás indemnizacións

O BNG presentou no Congreso iniciativas dirixidas ao Goberno central co obxectivo de esixir "actuacións contundentes" para garantir os dereitos dos usuarios de compañías aéreas, fronte ás queixas por prácticas abusivas e incumprimentos das obrigacións legais por parte da maioría desas empresas.

Nun comunicado, o deputado do BNG, Néstor Rego, denunciou que os usuarios son "obrigados" a recorrer á vía xudicial para conseguir as indemnizacións que lles corresponden por cancelación ou atrasos de voos, ante a "negativa sistemática das compañías a cumprir coa normativa europea vixente".

Rego explicou que a "falta de resposta" dos servizos de atención ao cliente, as restricións abusivas sobre a equipaxe e o incumprimento do regulamento que establece os dereitos dos pasaxeiros, son algunhas das "principais queixas" presentadas polos afectados ante organismos como Consumo ou a Axencia Estatal de Seguridade Aérea (AESA).

"Algunhas das compañías non só ignoran as reclamacións extraxudiciais, senón que cando se dita unha sentenza favorable, obrigan aos afectados a solicitar a execución xudicial para cobrar o que lles corresponde. É unha estratexia deliberada para disuadir aos clientes de exercer os seus dereitos", advertiu Rego.