Non basta crecer, hai que crecer máis e máis: Inditex vólvese a afundir en bolsa tras presentar resultados marca

As accións de Inditex, o xigante téxtil con sede en Arteixo matriz de Zara, esborralláronse este mércores na Bolsa de Madrid tras a presentación dos seus resultados anuais correspondentes ao exercicio 2024. A pesar de rexistrar un beneficio neto histórico de 5.866 millóns de euros, o que supón un incremento do 9% respecto ao ano anterior, o mercado reaccionou cunha caída superior ao 8% na apertura, agravada por un retroceso do 3% xa sufrido na xornada previa. A razón principal parece ser a desaceleración no ritmo de crecemento, que non cumpriu as elevadas expectativas dos investidores.

Expectativas frustradas

O informe financeiro de Inditex, dado a coñecer esta mañá, reflicte unha facturación de 38.632 millóns de euros, un 7,5% máis que en 2023, consolidando outro ano de cifras marca. Con todo, o mercado anticipara un avance máis robusto, especialmente tras o crecemento a dobre díxito que a compañía mantivera en exercicios anteriores. Analistas apuntan a que a retardación das vendas, que se situaron nun modesto 4% entre o 1 de febreiro e o 10 de marzo de 2025, foi o detonante do castigo bolsista. Este dato, o máis baixo desde a pandemia, contrasta coas previsións dun 8% e xerou dúbidas sobre o impulso futuro da empresa.

A xornada bolsista comezou cun Ibex 35 en positivo, subindo un 0,4%, pero o esborralle de Inditex, que ten un peso significativo no índice, deu un xiro ao selectivo, levándoo a terreo negativo cunha caída do 0,4% minutos despois da apertura.  
 

Resistencia e perspectivas

A pesar do pau en bolsa, Inditex mantén unha sólida posición financeira, cunha marxe bruta estable no 58,5% e unha forte xeración de caixa que lle permite anunciar un aumento do dividendo. Este movemento busca reforzar a confianza dos accionistas nun contexto de incerteza. Desde a compañía sublíñase o forte desempeño operativo e a boa acollida das coleccións, aínda que o impacto dos tipos de cambio e a debilidade dalgunhas divisas en mercados emerxentes lastraron os ingresos.
 

Algúns expertos, como os de Jefferies, ven un raio de esperanza ao considerar que a mellora climática podería reactivar as vendas nas próximas semanas, mentres que outros, como os analistas de Bernstein, advirten que se necesita unha aceleración significativa para recuperar as expectativas do mercado. 

Neste sentido, o soporte técnico dos 44,80 euros por acción perfílase como un nivel crítico: se non o mantén, a caída podería intensificar; si rebota, podería marcar un punto de inflexión. . Pola súa banda, expertos de JPMorgan advirten que as "débiles cifras comerciais actuais" poderían afectar o sector en xeral e a competidores como H&M.

Un líder baixo presión

Cunha capitalización bolsista que rolda os 140.000 millóns de euros, Inditex segue sendo o líder indiscutible do sector téxtil en España e unha das maiores empresas cotizadas de Europa. Con todo, o tropezo deste mércores pon a proba o seu reinado. A acción, que alcanzara máximos históricos próximos aos 56 euros nos últimos meses, perdeu máis do 20% desde ese pico, reflectindo a esixencia dun mercado que non se conforma con marcas pasadas, senón que demanda un crecemento sostido no futuro.
 

Inditex planea investir 1.800 millóns de euros en 2025 para a renovación de tendas e melloras tecnolóxicas. Ademais, prevé abrir novas tendas en países como Iraq, Suecia, Países Baixos e Alemaña. A compañía tamén anunciou un incremento do dividendo do 9%, até 1,68 euros por acción, como mostra de confianza na súa solidez financeira.

Os ingresos de Inditex tamén alcanzaron cifras marca, con 38.632 millóns de euros, un 7,5% máis que en 2023. Con todo, este crecemento é inferior ao de anos anteriores, o que xerou inquietude entre os investidores. Nas primeiras semanas de 2025, as vendas aumentaron só un 4%, en contraste co 11% do ano previo. 

É dicir, aos investidores capitalistas non lles abonda con que a empresa siga crecendo, esixen que o seu crecemento sexa cada vez maior. De non conseguilo a dirección que encabeza Marta Ortega terá que lidar cunha perspectiva de depreciación das súas accións, algo que pode afectar á economía de miles de galegos que posúen títulos da empresa.

Inditex rexistrou un resultado neto de explotación (Ebit) de 7.554 millóns de euros até o trimestre 4 de 2024.

Quen perde cando caen as accións de Inditex?

Inditex, a multinacional galega líder no sector téxtil, presenta unha estrutura accionarial dominada polo seu fundador, Amancio Ortega, quen posúe aproximadamente o 59,294% das accións a través das súas sociedades de investimento. A principal destas é Pontegadea Investimentos, S.L., que controla o 50,010% do capital da compañía. Outra sociedade vinculada a Ortega, Partler 2006, S.L., posúe un 9,284% adicional.

Ademais, Sandra Ortega, filla do fundador, posúe indirectamente un 4,509% de Inditex. Esta participación canalízase a través de Rosp Corunna Participacións Empresariais, S.L., empresa da cal Sandra Ortega é propietaria maioritaria.

O capital restante da compañía, coñecido como free float, representa aproximadamente o 35,814% e está en mans de investidores institucionais e comerciantes polo miúdo. Entre os accionistas institucionais destacados atópanse Capital Research and Management Company cun 1,71%, BlackRock, Inc. cun 1,41%, e The Vanguard Group, Inc. cun 1,33% de participación.