A Xunta convoca axudas para impulsar a capacidade competitiva das empresas galegas

O Diario Oficial de Galicia publicou este martes a base reguladora e a convocatoria das axudas que buscan impulsar a modernización tecnolóxica e a capacidade competitiva do tecido empresarial galego.

Segundo informa a Consellería de Economía e Industria, as axudas, en concorrencia non competitiva, ascenden ao 40% dos custos até un máximo de 300.000 euros e o prazo de presentación de solicitudes estará aberto até o 10 de outubro.

O obxectivo é potenciar o mantemento e a creación de emprego, a innovación e o impulso de novos proxectos empresariais a través de apoios que facilitan a adquisición de equipamento para as empresas.

Neste marco, entre as principais novidades destaca o feito de que poidan optar a esta liña empresas de todas as actividades económicas, excepto as excluídas polo regulamento comunitario.

Ademais, para reforzar os investimentos inmediatos sen prexudicar a liquidez e a solvencia das empresas, inclúese un anticipo do cento por cento de axuda, estando tamén prevista a exención de garantías.