Condenan a 10 anos de prisión aos atracadores do Corte Inglés que agrediron ao persoal de seguridade

O 17 de xaneiro de 2023 tivo lugar unha serie de roubos con dous protagonistas á fronte destas subtraccións sobre a que agora se pronunciou a Sala do Civil e Penal do Tribunal Superior de Xustiza de Galicia (#TSXG) e que condena aos dous ladróns a unha pena de dez anos e medio de cárcere a cada un deles polos atracos perpetrados, o furto dun vehículo e a agresión ao persoal de seguridade do Corte Inglés da Coruña, entre outros delitos. 

SECUENCIA DOS FEITOS

Os feitos remóntanse a fai máis dun ano, cando os procesados roubaron un coche en Oleiros e iniciaron a súa ruta de golpes. A súa primeira parada foi O Corte Inglés da Coruña, onde accederon tapados: un cunha bolsa na cabeza; outro con lentes de sol, gorro e unha braga ao pescozo. Xa nos grandes almacéns, un deles achegouse ao auxiliar de seguridade e asperxeuno na cara "cun spray de pementa ou semellante", di o auto, que referenda o fallo inicial emitido pola Audiencia Provincial da Coruña.

Tras isto, o outro individuo utilizou un extintor para provocar fume na zona a fin de evitar que as cámaras de seguridade filmasen o que ocorría e crear confusión. Nese ambiente, trataron de roubar na tenda, sen éxito, grazas á intervención dun vixiante de seguridade da empresa.

Despois dese roubo frustrado, os procesados fuxiron da Coruña en coche, dirección ao Centro Comercial As Termas, en Lugo, de onde levaron a caixa rexistradora dun Burger King. Nesta nova escapada, un coche de policía decatouse do ocorrido e iniciouse unha persecución pola A-6 dirección Madrid. "Conduciron a gran velocidade, a pesar das circunstancias climatolóxicas adversas, ata que, sobre as 23:30 horas do mesmo día, no punto quilométrico 473 tiveron un accidente", explica a Sala no auto. Aínda que abandonaron o lugar do sinistro, foron detidos ao día seguinte.  

ALEGACIÓNS E CONDENA

Ante este relato, os maxistrados rexeitan que se quebrantasen as normas e garantías procesuais, tal e como indicaba o recurso dos condenados, xa que cren que é "indubidable" que cando foron fotografados na vía pública eran xa investigados "porque estaban a ser certamente obxecto dunha incipiente investigación, ao existir boas razóns para iso nunha fase preprocesal, onde non poderían ostentar aínda a condición que se pretende pola defensa". As outras alegacións, como a de erro na valoración das probas ou a vulneración do principio de presunción de inocencia, tamén foron despachadas polo alto tribunal galego.

Desta forma, o TSXG confirma a condena a dez anos e medio de cadea polo delito de roubo de uso de vehículo a motor -con agravante de reincidencia-, tentativa dun delito de roubo con violencia ou intimidación en establecemento aberto ao público con uso de armas ou instrumentos perigoso -con agravantes de reincidencia e uso de disfrace-, dous delitos leves de lesións e un delito de roubo con forza en establecemento aberto ao público. Polos delitos de lesións, ademais, impónselles unha sanción económica. 

De igual maneira, a pena incorpora a prohibición de aproximar ao Corte Inglés de Ramón e Cajal durante un período de catro anos e medio. Ao tempo, cabe precisar que a un dos condenados procesoullo tamén como autor dun delito de uso ilexítimo dun documento de identidade auténtico, pero alleo. Por este delito fóronlle engadidos outros seis meses de cárcere.