Concentración en Burela contra os proxectos de eólica mariña

A plataforma en Defensa da Pesca e dos Ecosistemas Mariños (antiga Plataforma Manifesto Burela) convoca este sábado, 6 de abril, en Burela unha concentración, a partir das 12,00 horas ante a confraría, en contra dos proxectos de eólica mariña.

Esta plataforma critica o proxecto de decreto do Goberno polo que se regula a eólica mariña, "que dá o pistoletazo de saída á poxa de caladoiros de pesca para ser ocupados pola industria", "sen ningunha consideración cara aos seus impactos socioeconómicos na pesca e os impactos nos ecosistemas mariños".

Así, quérese "reivindicar a supervivencia dos pobos pesqueiros" fronte "á cobiza das enerxéticas e a complicidade do Goberno español para implantar a eólica mariña en augas españolas sacrificando" aos pescadores e zonas mariñeiras.

Eólica Así Non, o BNG ou a CIG son algúns dos apoios que trasladaron o seu apoio á mobilización. Precisamente, a Coordinadora Eólica Así Non avisa de que estes proxectos de eólica mariña "son incompatibles cos usos tradicionais na costa", o mantemento da actividade pesqueira e a preservación da biodiversidade.