Así é o Friburgo, rival do EuroCelta: un habitual en Europa, sen estrelas e moi similar en 'modelo A Madroa'

A vitoria de onte en Lyon ingresou directamente nas páxinas máis douradas da historia do Celta de Vigo. O 0-2 en casa dun dos favoritos a levar a Europa League encumbra ao conxunto celeste e sitúao, xunto a Aston Villa e O Porto, como un dos firmes candidatos a pelexar polo cordón internacional. É pronto para falar das opcións deste Celta, pois en cuartos de final espera un rival serio e que pasou sen apuros en oitavos, polo que en Vigo deben estudar ben a un Friburgo que chega practicamente no bico dos pés pero coa o que hai que ter moi en conta.

As VIDAS PARALELAS DE CELTA E FRIBURGO

A realidade de Celta e Friburgo non son tan distintas, en verdade. Os dous son "clásicos" do seu campionato, sen poder presumir de ningún gran título nas súas vitrinas máis aló dalgún trofeo na Segunda División de cada país e coar nalgunha final copeira de infausto recordo. Aínda que historicamente foron equipos considerados ascensor, non foi até mediados da pasada década cando se estableceron de maneira definitiva na elite. 

En Vigo, a finais do século pasado e principios do presente, eran habituais os partidos nas competicións europeas, chegando a disputar a Champions, algo que se lle resiste a un Friburgo que comezou o seu tour polo Vello Continente despois do seu último ascenso á Bundesliga. Desde a tempada 16/17 clasificáronse en catro ocasións para a Europa League por só unha do Celta. 

Este ano romperon o seu teito, alcanzando uns cuartos de final que até agora se lle resistiron aos do Europa-Park Stadion, o recinto dos xermanos onde se xogará a ida das semifinais o 9 de abril ás 21 horas. 'Os voitres', como se coñece popularmente ao conxunto teutón, viven unha campaña ilusionante e sen sobresaltos: oitavos na Bundesliga, lonxe do descenso pero tamén lonxe de Europa nestes momentos, onde están a callar unha sensacional tempada, igual que en Copa, onde son semifinalistas e onde se xogarán este fin de semana contra o Stuttgart un pase á final. 

SERIOS ATRÁS E CON ALGUNHA GRAN PROMESA

Os de branco e vermello foron sétimos na liguiña da Europa League, onde só perderon un partido, o último ante o Lille fóra de casa, e con grandes triunfos contra rivais da talla do Salzburgo, Niza ou Basilea. O golpe sobre a mesa dérono onte, en oitavos contra un Genk que chegaba a Alemaña cun 1-0 a favor da ida. 

O partido acabouse á hora de xogo, cando o marcador era de 4-1. O Friburgo, que até entón só marcara máis de dous goles nun partido e que só encaixou seis tantos en dez encontros, fíxolle unha manita aos belgas, que se deron de bruzos contra un conxunto que destaca por non prodigar moito en ataque, onde tentan aproveitar cada mínima oportunidade, e por ser solidarios en labores defensivos. 

Nese apartado destaca especialmente o suízo Johan Manzambi, de só 20 anos. O elvético é o encargado de frear ao rival e de organizar a saída da pelota para que chegue nas mellores condicións ao xaponés Suzuki ou ao croata Matanović, os grandes perigos ofensivos dos xermanos xunto a unha lenda viva como Vincenzo Billa, que en Friburgo resulta o equivalente a Iago Aspas en Vigo, tanto por peso na súa historia como por importancia dentro do equipo e o vestiario, sendo hoxe un dos máis veteranos dun equipo novo, outra similitude que comparten cos vigueses. 

Seguramente no que resultan máis semellantes Celta e Friburgo é na súa aposta por xente da casa. Si son os cachorros da Madroa os que cambiaron a cara ao cadro celtiña, en Friburgo son os futbolistas que promocionan do filial, como o citado Manzambi que chegou ás divisións inferiores do equipo até debutar cos maiores e figurar na lista de desexos de moitos grandes clubs, os que están a levar ao equipo desta cidade alemá de algo máis de 200.000 habitantes (até nisto parécese a Vigo, aínda que gañan os olívicos neste apartado) a soñar con grandes cousas.

Ante o Genk, tanto o porteiro Atubolu -un futbolista a apuntar na axenda-, como a liña defensiva composta por Treu, Ginter, Ogbus e Makengo, son xogadores formados no fútbol basee do Friburgo, unha clara declaración de intencións do que propón Julian Schuster (só dous anos maior que Giráldez, pero tamén dirixindo ao club da súa vida na súa segunda campaña completa á fronte do primeiro equipo, exactamente igual que o do Porriño). 

As semellanzas entre os de Vigo e os de Friburgo de Brisgovia son moitas. A principal diferenza radica na súa proposta sobre o tapete: mentres que os galegos son un equipo alegre e valente en ataque, os alemáns prefiren tapar e esperar ao rival. Será un duelo de contrastes entre dúas entidades con moitos puntos en común, pero que perseguen un mesmo soño: as semifinais da Europa League, uns meles que o Celta xa probou e que en Friburgo aínda non saborearon. Esperemos que tampouco lles toque este ano degustalas.