A parábola do fillo pródigo: Fer López, como tolo por volver ao Celta de Vigo neste mercado de fichaxes

Fer López saíu do Celta de Vigo o pasado mes de xullo coa ilusión de ser unha das sensacións da Premier League este ano. Con todo, despois da súa sensacional tempada en Vigo no curso 24/25, o madrileño descubriu que é mellor ser cabeza de rato en Balaídos que cola de león en Iglaterra. O proxecto do Wolverhampton naufraga e o centrocampista non está nin no posto de mando nin na sala de máquinas, xa que para atopalo na lista de minutos dos Wolves hai que baixar até as galeras, con só oito presenzas ligueiras. Así as cousas, Fer ten como obxectivo abandonar o barco e regresar a casa este mesmo mes de xaneiro, pero parece que as cousas non serán tan sinxelas.

DESANDAR O ANDADO

Neste mundo onde os futbolistas se expresan a través das súas contas de redes sociais, o mediapunta mostrou os seus desesos en forma de canción, co tema 'Homecoming' nunha publicación de Instagram, onde, segundo a letra de Kanye West, parece desexoso de volver aos seus inicios: "Pensas en min de cando en vez? Agora estou a volver a casa. Talvez poidamos empezar de novo".

Con esa chiscadela ilusionou á afección celtiña, que o ten como un dos seus desexos de Nadal. Claudio Giráldez, tras a súa marcha, demandou á dirección deportiva atopar a un futbolista cos seus mesmas condicións na anterior xanela de fichaxes, pero aínda que se tentearon opcións como as de Denis Suárez e Brais Méndez, ningún terminou por chegar a Vigo. 

Agora o que podería regresar é Fer López, que só gozou de 346 minutos entre liga e copa nun Wolverhampton que aínda non sabe o que é sumar tres puntos dunha tacada: en 19 partidos cultivaron tres empates e 16 derrotas. Nin un só triunfo para o declarado, segundo as estatísticas, como o peor equipo da historia da Premier League. Os fríos números non teñen piedade co equipo de Hugo Bueno ou Strand Larsen, outros dous vellos coñecidos das rúas de Vigo.

As opcións de que Fer López volva vestir de celeste pasan por un acordo en forma de cesión, xa que nin o Wolverhampton quere desprender así como así dun das súas grandes fichaxes do verán nin o Celta pode reembolsar os 23 millóns cos que saíu rumbo a Gran Bretaña. As primeiras informacións apuntan a un préstamo por 18 meses, o que garantiría telo, polo menos, até xuño de 2027.

No entanto, e aínda que a dirección técnica vería con bos ollos o seu regreso, fan falta cadrar moitos números na Sede. O primeiro escollo é a falta de oco. Todas as fichas están cubertas no primeiro equipo. Aidoo, Cervi ou Ristic terían que saír este mes de xaneiro para que cristalice a chegada de Fer López. Ademais, o acordo debe de ser o suficientemente beneficioso en termos económicos para que o Celta se lance a asumir a ficha do futbolista, que viu multiplicados os seus emolumentos cando fichou polos ingleses. Agora tócalle a Jorge Mendes mover ficha e tentar relanzar a carreira de Fer López, coa incógnita de saber como será recibido en Vigo o fillo pródigo arrepentido.