Avó dun árbitro de balonmán agredido nun partido en Sanxenxo segue en coma tras dous meses

Diso informou este xoves a Federación Galega de Balonmán que, nun comunicado, traslada o seu apoio a familia e achegados da vítima, que presenta "un prognóstico moi pesimista que tan só se podería reverter cun auténtico milagre".

A federación lamenta que o suceso ocorrido o 15 de decembro en Vilalonga desencadee "un verdadeiro inferno" para o agredido e a súa familia, que se viu obrigada a "pechar de maneira definitiva o negocio familiar" mentres "o presunto agresor atópase realizando unha vida completamente normal".

A entidade que rexe o balonmán galego espera que o proceso xudicial aberto contra o suposto agresor "finalice dirimindo responsabilidades de unamanera contundente, algo que nunca vai paliar o dano provocado a este familiar pero que, polo menos, axude a evitar que sucesos como este volvan suceder"

FEITOS 
Os feitos producíronse o 15 de decembro, cando o pai dunha xogadora que participaba no partido de categoría cadete feminina disputado en Vilalonga entre o Sanxenxo Balonmán e o Club Rasoeiro Balonmán agrediu ao avó do árbitro do encontro, que resultou ferido de gravidade.

Segundo fontes consultadas por Europa Press, os feitos sucederon cando o árbitro, duns 15 anos, pitou un penalti e un dos pais do equipo contrario comezou a insultalo.

Así, o avó do colexiado, que se atopaba neses momentos no pavillón, dirixiuse a este home e, tras unha pequena liorta, o agresor empuxouno, perdeu o equilibrio e golpeouse na cabeza.

A Garda Civil confirmou máis a tarde a presentación dunha denuncia por estes feitos en Sanxenxo que sinala ao suposto autor da agresión como un coñecido no ámbito federativo por comportamentos desta índole.