Máis de 4.000 nenos marcarán goles e anotarán canastras para loitar contra o cancro infantil

Máis de 4.000 nenos de 33 clubs de baloncesto e de fútbol de Galicia súmanse este fin de semana ás iniciativas solidarias 'Canastras contra o cancro infantil' e 'Goles contra o cancro infantil', partidos cuxos fondos se destinan á investigación da enfermidade, da que cada ano son diagnosticados 1.300 menores en España.

Estes movementos de sensibilización xorden no marco do Día Internacional do Cancro Infantil, que se celebra cada ano o 15 de febreiro, da man da Fundación Unoentrecienmil.

Só este fin de semana participarán, das dúas disciplinas, máis de 84.000 nenos de 569 clubs e 6.356 equipos de toda a xeografía española. No caso de Galicia, son 33 os clubs participantes, con 350 equipos e 4.115 xogadores.

En canto á recadación, coa participación de clubs de baloncesto de España e clubs de fútbol de Castela e León, en 2024 conseguíronse 220.000 euros. Cifras que desde Unoentrecienmil confían en multiplicar este fin de semana e en próximos partidos até superar as do ano pasado e conseguir os equipos máis solidarios contra o cancro infantil.

DINÁMICA DOS PARTIDOS

Nun comunicado explican que estes partidos solidarios servirán para recadar fondos que axuden a impulsar proxectos de investigación para combater o cancro pediátrico e mellorar os tratamentos tamén a través da práctica de exercicio físico.

No caso do baloncesto, os nenos e nenas participantes cambiarán os puntos que marquen por euros. Nos partidos de fútbol, cada xogador achegará un euro.

Ademais, existen outras iniciativas solidarias que os propios clubs pon en marcha para aumentar a recadación, pero sobre todo para mostrar a súa solidariedade cos nenos enfermos de cancro.