Xogador do CFB Poio expulsado do club tras agredir ao delegado do CED Cotobade druante un partido

O futbolista do CFB Poio identificado como o autor dunha agresión ao delegado do equipo rival foi expulsado "inmediatamente" polo seu club.

A vítima era un representante do conxunto local, o CED Cotobade, que sufriu un brutal ataque por parte desta persoa que se atopaba presenciando como público o partido de Terceira Futgal.

O presidente do CED Cotobade, Óscar Pinto, explicou que o suceso tivo lugar no minuto 89 deste encontro. O resultado era de 3-1 e o partido "estaba a ser en grao sumo tranquilo, non houbo nada", ata que "unha muller e o seu marido entraron no terreo de xogo e pegáronlle un bofetón ao noso porteiro suplente, porque lles aplaudiu".

O máis grave con todo chegou xusto despois cando "un xogador do Poio que non estaba convocado", explica, "deulle unha puñada brutal ao delegado".

Tanto o Cotobade como o CFB Poio recoñecen ao agresor como futbolista do equipo visitante e, por iso, o propio conxunto de Poio decidiu que "inmediatamente ese xogador que non estaba convocado causa baixa", avanzou o seu presidente José Manuel Lema confirmando que foi expulsado do club.

"Estamos avergonzados", dixo o presidente. "Hai case 200 nenos que pertencen a este club e que non se merecen esta imaxe", sostivo José Manuel Lema, que asegurou que porán todos os medios para que algo así "non volva suceder".

Debido a este incidente foi requirida a presenza no campo de As Extremas dunha patrulla da Garda Civil, que identificou a persoas implicadas na liorta pero non ao principal agresor, que foi localizado posteriormente xa que abandonara o recinto deportivo.

Desde o CFB Poio ofreceuse toda a colaboración posible e apoio ao CED Cotobade.

O vídeo da retransmisión do encontro recolle o momento da agresión.