O galego Joselu recibido como un emir en Qatar tras gañar a Eurocopa
Tras o seu ano máis exitoso, o de Silleda emprende unha nova aventura no fútbol de Asia.
O dobre campión de Europa (Champions co Real Madrid; Eurocopa con España) xa está en Doha. O galego Joselu acaba de aterrar en Qatar para enrolar nas filas do Ao Gharafa, equipo que recibiu ao dianteiro coas máximas honras no aeroporto, case sen tempo a baixar do avión antes de recibir un baño de masas coa fichaxe estrela da liga qatarí.
Tras vestir as cores de Alavés, Espanyol ou Deportivo da Coruña en Primeira División, o de Silleda despídese do Real Madrid despois dunha soa tempada na que foi unha peza importante dos brancos para a conquista da liga e a Champions League, onde tivo un papel destacado en semifinais cos dous goles que remontaron o choque contra o Bayern de Munich.
Joselu enfróntase agora á súa terceira experiencia no estranxeiro. Na súa folla de servizos atopamos goles en Alemaña, coas camisetas de Hoffenheim, Hannover e Eintracht de Frankfurt, e en Iglaterra, vestindo as casacas de Stoke City e Newcastle. No entanto, nin na Bundesliga nin na Premier mostrou o acerto realizador que si tivo en España, especialmente despois de superar a trintena.
O ariete márchase pola alta competencia que promete haber na fronte de ataque do Bernabéu o próximo ano, con Endrik e Mbappe recentemente chegados para buscar un oco nunha liña onde xa están Vinicius, Rodrygo, Brahim ou Bellingham. Compartirá vestiario con dous vellos coñecidos da liga, como son os alxerinos Boulaya e Brahimi. Promete ser este un caloroso e dourado retiro para o galego.
Escribe o teu comentario