A edición máis grande dos Xogos do Eixo Atlántico comeza este fin de semana en Vila Nova de Famalicão

Todo listo e a punto para unha nova edición dos Xogos do Eixo Atlántico. O evento, que reunirá a máis de 2.400 participantes de municipios de Galicia e o Norte de Portugal, promete ser a cita máis grande das celebradas até a data, tendo en conta que esta será a XV Edición dunha iniciativa que non deixou de crecer desde a súa posta en marcha fai xa 30 anos.

Nesta ocasión, os Xogos do Eixo celebraranse do 30 de xuño ao 5 de xullo, dacabalo entre Vilanova de Famalicão, que acollerá a inauguración este domingo nos xardíns do Paços do Concelho a partir das 17 horas, e Braga, onde tamén se celebrarán algunhas competicións dun certame que contará con balonmán, baloncesto e fútbol 7, nos tres casos tanto en categoría masculina como feminina. Ademais, atopamos as probas de natación e atletismo, tamén estas dúas coa súa modalidade adaptada. 

"UN EVENTO ÚNICO EN EUROPA"

Con esta nova celebración bianual, desde o Eixo Atlántico reforzan o seu compromiso co deporte, un das pontes de unión que a entidade trasnfronteriza utilizou para conectar aos dous territorios separados polo río Miño. Ao tempo, serve para reafirmar a aposta do Eixo polos máis novos, protagonistas en cada edición dos Xogos en "un evento deportivo transfronteirizo único en Europa" que cada ano se fai máis e máis inclusivo, coa participación de até 200 competidores no deporte adaptado.

"Os Xogos fomentan a participación de toda a cidadanía e a construción da Eurorrexión do Eixo Atlántico que, á súa vez, enmárcase na construción da Europa das cidades e da cidadanía. O deporte, a cultura e a educación son elementos imprescindibles para a construción dunha Europa social que impulsou Jacques Delors fai 30 anos e que hoxe están en risco ante o ascenso dunha extrema dereita antieuropeísta", subliñan os organizadores. 

"Nesta XV edición, o deportista homenaxeado é Luís Silva, medalla de ouro no Campionato de Europa de Boccia en 2013. O atleta paralímpico é o primeiro famalicense en conquistar unha medalla olímpica xa que conseguiu a prata na modalidade Pares BC3 nos Xogos Paralímpicos de Londres, en 2012", apostilan desde o Eixo no seu comunicado.