Último día de fichaxes: Carles Pérez ao Xetafe? O Celta apura a últimas hora do mercado

Últimas horas frenéticas na Sede, onde os teléfonos da oficina non pairan de soar e os fax teñen o papel listo para calquera imprevisto. O mércores pola noite concretouse, como xa avanzara Galiciapress, o desembarco de Tadeo Allende en Balaídos procedente de Godoy Cruz, o que podería dar carpetazo ao tema das chegadas no Celta de Vigo. No entanto, queda por saber se alguén abandonará Vigo ao longo do día de hoxe, con varios nomes pendentes.

Allende reforza un ataque ao que lle faltou gol este curso pero que ten en nómina a unha boa ristra de xogadores. Aspas, Larsen, Douvikas, Bamba...o número de efectivos arriba pode supor un problema para o desempeño de talentos emerxentes como Miguel Rodríguez. Coa chegada de Allende, a parcela está máis que cuberta e podería empuxar a algún futbolista a buscar unha saída nestas últimas horas de mercado, con todas as miradas apuntando a Carles Pérez.

O ex de Barça e Roma non está a ofrecer o rendemento esperado. O Celta fixo un gran esforzo económico este verán para traelo de volta tras a súa cesión pero a súa traxectoria foi claramente de máis a menos, cun decepcionante balance final: nove partidos ligueiros, sen goles nin asistencias. Benítez non o ten entre as súas prioridades e o interese do Xetafe -que podería quedar sen Ünal este xoves- ábrelle unha porta interesante.

Mención á parte merece Fran Beltrán. O Xirona segue á espreita aínda que o seu interese parece haber arrefriado. É un futbolista con contrato até 2026 e os líderes de Primeira terían que negociar por el. Míchel segue buscando un recambio para Oriol Romeu e suspira por traer de volta ao centrocampista culé, pero se isto non cristaliza finalmente -as baixas no Barça fan pensar que non se fará- podería lanzar as súas redes sobre o futbolista celtiña.