A organización de 'O Gran Camiño' causa danos na Catedral de Lugo, patrimonio recentemente restaurado

O atrio da Catedral de Lugo, patrimonio cultural, apareceu este xoves cuns pequenos buracos nas laxas do solo que serviron para colocar a cartelaría, os valos e demais material para o arranque da volta ciclista 'O Gran Camiño', patrocinada por varias administracións públicas.

Mario Vázquez, o deán da catedral, declarou que o Bispado estuda reclamar os danos feitos neste espazo privado que, aínda que está aberto ao público, foi invadido para esta proba sen que "ningunha institución" pedise permiso nin comunicase "nada".

Os responsables da Catedral atopáronse este xoves pola mañá con todo montado sen ter coñecemento diso. Neste momento, preguntóuselles aos responsables da montaxe se tiñan autorización para facelo, ao que responderon que non. O deán lembra, de feito, que o habitual é que se presente unha solicitude por escrito para que o Bispado permita o uso deste espazo "con condicións".

Unha vez realizados os buracos "pediron perdón". "Pero o dano xa está feito", sinala o deán. Até o momento, o que fixeron foi levantar acta do ocorrido e facer fotos, para posteriormente avaliar si reclaman danos ante as administracións competentes.

"Non queremos conflito con ninguén, pero hai que protexer o patrimonio e para iso estamos a traballar coas institucións", subliña Vázquez, quen lembra, precisamente, que o solo do atrio da Catedral de Lugo foi restaurado o ano pasado.

Fontes da Xunta de Galicia confirmaron que o Bispado xa se puxo en contacto coa Dirección Xeral de Patrimonio Cultural para comunicarlle o ocorrido. Posteriormente, a Administración autonómica prevé abrir "dilixencias informativas".

O atrio da Basílica de Lugo serviu como escenario de arranque da carreira ciclista 'O Gran Camiño'. O evento está patrocinado polas catro Deputacións provinciais de Galicia, ademais de pola Xunta e o Xacobeo, ademais doutras empresas e institucións. Tamén conta coa colaboración do Goberno de España e, no caso da saída, do Concello de Lugo.